Shillong, Naitung 22: Ka party PDF Mylliem Zonal Committee ka Ai Khublei Kitbok Kitrwiang ia ki Samla Kynthei bad Shynrang ki ba la trei shitom ban duriap bad kiba la ioh ban kheit ia u Soh jong ka jingjop hakane ka Exam Matric bad Class-XII ba dang shu dep pynbna ia ka resol.
Ha ka juh ka por ka PDF Mylliem ka pynpaw ia ka jingsngew nguh bad sngewburom ia ki Kmie ki Kpa, Ki Skul bad ki Nonghikai ki ba la long ki Rishot ia ki Khynnah Samla ba kin poi sha ka Thong, ka jingbtin lynti bad ai mynsiem ka jong ki, na ka por sha ka por kadei ka jingnoh synniang ka ba khraw kaba pynshlur ia ki khynnah pule ba kin thom shaphrang ban wad ia ka jingstad bad ban kiew sha ki kyrdan ki ba kham shalor.
Ka PDF mylliem Zonal Committe ka ai Khublei kyrpang ruh ia ki Samla ki ba ioh ia ki top 20 position, kane ka pynpaw ia ka jingtreishitom ba tyngeh jong ki Samla, bad ka PDF ka sngew sarong na bynta I Samla Balarihun Kharlukhi na ka Ramakrishna Mission Secondary School, Mylliem i ba la ioh ia ka 6th position, Ka PDF ka phah ia ka kyrkhu kydoh ia I, ia ka Skul bad ki ba ha ing ki ba la wanrah ia ka burom ia ka thain Mylliem.
Ha kajuh ka por ka PDF Mylliem ka kyrpad ba la da don kino kino ki Samla ki ba ioh ia ka kyrdan top-20 ba shong ba sah ha Mylliem constituency kin sngewbha ban pyntip sha office ka PDF ba don ha Lummawbah.
Ka PDF Mylliem ka pynpaw ruh ia ka jingsngewsih ba kumba ju leh man u Snem ban ai Khusnam ‘U Tirot Sing Academic Award’ ia ki ba pass bha,yn ym lah ban pynlong mynta u snem 2020 namar ka jingdon u Covid-19 bad ki jingpyrkhing ka Sorkar, te kumta la pynsangeh noh ia ka jingsam khusnam. Kane ka long kum ka jingpyntip sha ki Samla pule ka thain ba yn sa pynbna da kumwei pat ha ka por ka ban sa wan halor kane ka phang.
