Shillong, Rymphang 24: “Nga kum u President jong ka Meghalaya Pradesh Congress Committee (MPCC) nga ai khublei kyrpang ïa ki paidbah ka Khasi bad Jaintia Hills halor ka jingkyrshan jong phi ha ka jingjied ïa ki MDC jong ka Autonomous District Council (ADC) ba dang shu dep. Watla ki jingmih jong ka election kim long kumba ngi la angnud, hynrei nga da sngewnguh shisha ïa ka jingngeit bad ka jingkyrmen kaba phi la ai sha ka party jong ngi”.
“Nga kwah ban ai khublei kyrpang ïa baroh ki kyrtong jong ka Congress kiba la ïashimbynta ha kane ka election da ka jingtrei shitom bad ka jingshah ïakhun ha ki jingeh bapher bapher, kynthup ruh ki jingkthah na ka jingbym shaniah jong kiwei. Ka jing aitilud jong phi ha kaba trei na ka bynta u paidbah bad ka party kan long ka jingsahnam ba kyrpang”.
“Nga ai khublei ruh ïa baroh kiba jop ha kane ka election, watla phi dei na kano kano ka party. Ki paidbah ki la ai jingkyrshan ïa phi, bad nga kyrmen ba phin trei da ka jingstad bad ka jingshisha na ka bynta ka bha ka miat jong ki riewlum bad ban pynneh pynsah ïa ka mynsiem jong ka Sixth Schedule”.
Ka Congress Party kan dang ïaitrei na ka bynta ban kyntiew ïa ka synshar paidbah ban pynneh pynsah ïa ki hok jong ngi kum ki trai ri, ban pynpoi ïa ka roi ka par sha baroh ki bynta jong ka Meghalaya.
Ngin dang iai shakri ïa ki paidbah da ka mynsiem kaba khlain, ban nang ïaid shaphrang bad ban wanrah biang ka jingïadei kaba jan bad ki jingangnud jong ki paidbah.
Shuh shuh, nga ai khublei bad ai mynsiem ïa baroh ki nongmihkhmat kiba la shah jied bad nga kwah ban pynpaw ba ka Congress Party kan dang ïai long kaba skhem ha ka thong jong ka ban trei na ka bynta ka jingbha, ka jingshitrhem bad ka jingshisha.
Iathuh ka kyrwoh khubor ba la phah sha ki ladpathai pathai khubor la pynpaw u Vincent H Pala, u President, Meghalaya Pradesh Congress Committee (MPCC).
