Shillong, Julliew 12: Ki ASHA kiba don hapoh ka shatri jong ka Meghalaya Asha Workers Union (MAWU) kila pynsngew sha ka sorkar halor ka jingeh kaba ki ia kynduh namar ka jingpynslem jong ka sorkar ban siew ia ki jingsiew kiba ki dei ban ioh kaba la sahteng naduh u snem 2012 haduh mynta ruh.
Ka MAWU ki kwah ban pynkynmaw ba u Myntri Rangbah ka jylla u Conrad K Sangma u la kular ba un siew dep lut ia baroh ki jingsiew jong ki ASHA naduh u snem 2012 haduh u snem 2018 hynrei haduh mynta ki dang ioh dang mar shiteng ia kitei ki jingsiew.
Kane ka jingpynslem ka sorkar ka la buh ia ki ASHA ha hapdeng ki jingeh nalor ba ka jingsiew ka long kaba rit kaba tang T.2000 tyngka shibnai bad kata ka T.2000 tyngka bun kaba kim ioh namar ba ki shim jingkheiñ ia ka jingsiew katkum ka jinglah jong ki ban treikam.
Kumba ka long baroh shi katta ki Asha ki ioh tang hapoh T.1500 tyngka shibnai bad kim pat ju ioh ia katei ka T.2000 tyngka bad nalor kata lada ki pang ki shitom kim ioh shuh tang shi tyngka ruh namarba kim lah ban leit trei ia ka kam jong ki.
Hadien ka jingwan lynshop jong ka khlam Covid 19, ka sorkar ka la pyntur ia ngi ki Asha ban iarap ia ki nongtrei ka koit ka khiah da kaba kular ban siew tam T.1000 tyngka shibnai kum ka Honorium na ka bynta ka jingtrei jong ngi ha ka jingiakhun pyrshah ia ka khlam Covid.
Hynrei kane ka la pynduhnong pynban ia ki namarba kila duh ban trei ia ki kam kiba ki ju trei manla ka sngi namarba ki paidbah ki tieng pynban ia ki namar ba kila ia kynduh ne kila iarap ia kiba pang Covid ne kiba haiing hasem jong kiba pang.
Ka jingbym ioh jong ki ban trei ia ki kam ba ki trei man ka sngi ka la pynlong ba ngin duh noh pynban ia katei ka jingsiew kaba ki dei ban ioh baroh shi katta namar ba ki siew ia ki katkum ki kam kiba ki trei bad kumba ka long mynta ki ioh jingsiew tang na katei ka honorium Covid kaba T.1000 tyngka shibnai.
Kim ioh shuh ia kaba ki dei ban ioh bad katei ka T.1000 tyngka ruh ka sorkar haduh mynta kam pat siew lut, ki Asha ba trei ha ki jaka nongkyndong ki la ioh jingsiew tang haduh u Lber 2021 katba kiba don ha ki Urban Areas pat ki ioh tang haduh u nohprah 2020.
Mynta lei lei ia katei ka T.1000 tyngka ka Honorium na ka bynta u Covid ruh kim shym la mang pisa shuh ban siew sha ki Asha bad ki bor ba dei peit ki la iathuh ba kim ioh order ban siew.
Kane ka jingleh ka sorkar ka la buh ia ki hapdeng ki jingeh namarba man ka sngi ki aiti lut ialade ha ka kam ban shakri ia ki paidbah bad ka sorkar ka la pyndonkam ia ki ym tang ha ka Health Dept hynrei wat ha kiwei ki Dept ruh kum ha Block Office bad kiwei hynrei ka jingsiew pat ngim ioh.
Lada ka long kumne kim sngewlah shuh ban dang iai bteng ia ki kam kiba ki trei bad ki ai por ia ka sorkar shi taiew kata haduh ka 18 tarik u jylliew 2021 ba ka dei ban siew dep noh ia ka jingsiew jong ngi bad lada ka sorkar kam leh eiei la rai ba kin sangeh treikam noh shisyndon.
Ki MAWU ka shim ia kane ka rai namarba kila dep ban phah jingthoh sha u Myntri ka koit ka khiah ruh u bah A.L Hek hynrei haduh mynta u Myntri u sngap jar jar, la ong ka kong Mirajune Myrsing president MAWU.
