Shillong, Kyllalyngkot 06: Ka seng Ribhoi Youth Welfare Organisation (RBYWO) ha ka sngi Thohdieng ka 5-01-2024 kala ioh ban plie bad aiti iaka iing bala pynshna da ka seng ia ka longing jongka Kong Bashisha Sohktung naka Shnong Mardon Nongbah.
Kane ka kong Bashisha ka don hapdeng ka jingeh hadien ka jingkhlad noh u lok jong ka bad ka don hynriew ngut ki khun bad ka hap ban iehnoh iaki khun badang ar snem snem duna haki hynmen ba dang hapoh 9 snem namar ka hap ban bylla ban ioh iaka bam.
Kine ki khun kim shem la iohlad iwei ruh ban leit school namar ka jingbymkot bor ban phah school bad ka khun heh kynthei ba dang hapoh 14 snem ruh ka hap ban shong bylla iing briew sha sor ban ioh ban kyrshan lang iaka kmie ban pyndap bam bad kiwei ki jingdon kam ha iing.
Kumta hapdeng shibun ki jingeh haka jingsdang ban shna ia kane ka iing hynrei ka jingiai don ryngkat u Blei mynta ka sngi la lah ban plie bad aiti noh iaka sha ka trai Kong Bashisha Sohktung kum ka jingai sngewbha snem thymmai bad ka seng ka kitbok ba kin iai don hapdeng ka jingkoit jingkhiah.
Ha kane ka sngi lah ioh jingkren ruh na u Bah Elvis Kyrsian Vice President ka seng, Bah Keny Nongrum Secretary bad la khap ia u ribon kum ka dak ka jingplie ia kane ka iing da u President bah Kharnaior, la ioh ruh ka jingdwai na u tynmen basan.
