Shillong, Nailur 26: Mynta ka sngi u Assitant Executive Engineer jong ka PWD Building u bah D Tariang ha dien bala pyndep ia ka jingshna ia ka iing skul ba thymmai jong ka Laban Bengalee Boys Higher Secondary School la aiti ia ki kot sha u President ka skul u SK Changopadhya ha dien bala dep ban pyndep ia ka jingtrei ia ka iing skul ba thymmai.
Ia kane ka jingiati ia kane ka iing skul kaba dang shna thymmai kaba la bei pisa lyngba ka Asian Development Bank ha ka jinglut kaba T.1.83 klur la pynlong hapoh katei ka skul ha ka jingiadon lang u MLA jong kane ka jaka u bah Sanbor Shullai u la la trei shitom ban pynioh ia kane ka jingbei pisa na ka sorkar jylla.
Haba kren ha kane ka jingialang u Bah Sanbor Shullai, u la pynpaw ia ka jingsngewnguh ia ka sorkar jong u Dr Mukul Sangma namar dei ha u snem 2018 la ioh ia ka jingmang pisa na ka bynta kane ka ing skul bad kum juh ruh ia kane ka sorkar jong u Conrad K Sangma kaba la shim khia ban pyndep ia kane ka jingtrei ha ka por kaba biang.
U bah Sanbor u la iathuh ba ia kane ka iing skul kaba thymmai kaba u la plie mynta ka sngi la ioh ia ka jingiarap lyngba ka skhim jong ka ADB, u la ong ba kila don bun ki jingeh ha kaba sdang hynrei la lah ban pynsngewthuh ia ki bor sorkar ha kito ki snem bad la ioh ia ka jingmang pisa bad mynta ka sngi la ioh ban plie ia ka.
Haba ia dei bad ka skul u la ong ba kane ka skul ka dei ka skul kaba la ailad ia ki long iing kiba duk ba rangli ba kin ioh ban pule ha kane ka skul bad kane ka skul kala lah ban pynpaw ia lade da ka jingpass bha jong ki khynnah ki eksamin jong ki bad kane ka dei ka jingtrei shitiom jong ki nonghikai.
Ha ka jingkren jong u President ka skul u S K Changopadhya, la iathuh ba ka jingangnud jong kiba pyniaid ia kane skul ban ioh ia ka iing skul ka biang ia ki khynnah ka dei kaba la slem, kum ki nongpyniad kul kila leit sha NEC, kila leit sha u MP u bah Vincent H Pala ban ioh jingiarap hynrei kila sep ei ka jingpyrshang.
Ha dien ba kila kut ki lat kila leit ban ia kynduh ia u MLA jong ki u Bah Sanbor Shullai bad ha kaba nyngkong u la shu ong buh ia ki kot ki sla un sa peit , namar ka jingshim khia ka jong ban kyntiew ia ka pule puthi la ioh ka lat ba pynrung ia kane ka iing skul kaba thymmai na ka skhim ADB ia kaba ki la ioh ban plie mynta ka sngi.
Ha kane ka sngi la don lang ki briew jong ka ADB, na ka tnad PWD building, ki nongkit kam shnong ban ia sakhi lang ia kane ka jingaiti ia ka iing skul kaba thymmai sha ki nongpyniaid ia kane skul, ha kane ka jingialang ia ka jingkren pdiang burom la ai da ka Principal ka Dr R Bbhatacharjee bad ia ka jingialang la pyniaid da ka J Goswami Vice principal.
