New Delhi, Jylliew 06: U Rajiv Kumar, Chief Election Commissioner of India ha ka jingsynranlang u Gyanesh Kumar bad Dr.Sukhbir Singh Sandhu, ki Election Commissioner, ki la ia kynduh ia ka President mynta ka sngi.
Ha kane ka jingiakynduh kila aiti sha ka President ia ka kopi jong ka Jingpynbna bala pyllait da ka Election Commission of India, ha kaba iadei bad ka kyndon 73 jong ka Representation of People Act, 1951, kaba don ki kyrteng jong ki dkhot ba la shah jied sha ka iing dorbar thawain hadien ka jingpynlong ia ki elekshon sha ka iing dorbar thawain Lok Sabha kaba 18.
Ka President ka la ai khublei ia u Chief Election Commissioner bad ki Election Commissioner halor ka jingjop ka kam pynlong ia ka elekshon, ka synshar paidbah kaba heh tam.
Na ka bynta ka ri baroh kawei, ka la ai jingiaroh ia ki sienjam jong ka Election Commission, ki ophisar jong ka bad ki briew kiba dei peit ia kane ka kam, kiwei kiwei ki nongpyniaid kam kiba ia don bynta ha ka jingpyniaid bad jingkhmih ia ka jingialap elekshon bad ka jingthep vote.
Ka President kala ai khublei ruh ia ki pulit bad ki nongpahara jong ka sorkar pdeng bad sorkar jylla kiba la trei shitom ban iada ia ka jinglong kyntang jong ka vote jong ki briew bad la pyndep ia ka kam jiednongmihkhmat kaba laitluid bad kaba ryntih.
Nalor kine baroh, ka la ai khublei ia ki million ngut ki nongthep vote kiba la iamih paidbah ban iashim bynta ha ka jingjied nongmihkhmat. Ka President ka la ong ba kane kalong kaba iahap bad ka riti synshar jong ngi bad ka kam synshar paidbah kaba skhem jong ka India.
