Shillong, Naitung 19: Mynta ka sngi ka seng HANM kala leit ban ai da ka jingthoh sha ka DGP jong ka jylla ka kong Idashisha Nongrang halor ka jingioh rung ki khar Bangladesh sha India na ki thian Danngar bad Balat.
Ha ka jingthoh ka seng kala kdew ba ki don ki briew kiba don kti ban rung ia ki khar Bangladesh da kaba shim pisa haduh T.10,000/- tyngka marwei ban pynrung sha India, ha kane ka jingiakynduh ka seng kala ban jur ba dei ban leh ei ei kloi ia kane.
Ka seng kala dawa ruh na ka DGP ba kan khot hajir ia ki shipai BSF kiba peit ia ki khappud bad ka Bangladesh ban pan jingshai na ki halor kane ka jingwan kiew ki khar Bangladesh da ka jingiatreilang ki riew shim kabu.
Haba kren ha ki lat pathai khubor ha dien ka jingiakynduh ia ka DGP u President ka seng u bah Lamphrang Kharbani la ong ba ka jingiakren ka long kaba seisoh ha kaba ka DGP kala ai ka jingkular ba kan leh ia kaba don kam.
Ha kane ka jingiakynduh la kyntu ruh ia ka DGP ba kan pynkloi ia ka jingiathung kam ia ki samla ha ka tnad pulit ba kin lah ban ai ka jingpahara kaba kham khlain namar lada ka jingwan ki briew na bar ri kan dang kiew lah ban duh noh ruh ia ka bor synshar ynda kila ia bun paid.
