Shillong, Naiwieng 14: Mynta ka sngi la pynkit hynriew ngut ki samla pule sha jaka sumar namar ka jingtlot jong ki ha dien ka jingiakhih shah thngan 214 kynta ban dawa ban weng kam noh ia u Registrar bad Deputy Registrar bad mynta ka long ba u Vice Chancellor dei ban hiar shuki.
Ki hynriew ngut ki samla pule kiba la rah mynta ka sngi sha jaka sumar ki long, Ibakordor Marweiñ Assistant general secretary, Samla Aibok Nongsteng organizing Secretary, Samla Fricky Marweiñ Assitatn organizing Secretary, Samla Robin Nongrem Assistant Education Secretary, Samla Ruksarbiya Khonglam Assistant Hostel Secretary baroh san ngut kidei na KSU NEHU unit bad u samla Sandy Sohtun President NEHUSU.
Ia kine baroh la pynkit sha NEHU Health Centre ba kin ioh ia ka jingsumar namar ka jingtlot ka jong ki bad ki samla pule ki dang iai bteng ia ka jingkhih ka jong ki haduh ba kin da ioh ban pynurlong ia ka jingweng ia u Vice Chancellor ka skul bah NEHU, kane kalong kat kum ka kyrwoh kaba la phah da u Assistant Publicity Secretary ka KSU NEHU Unit.
Namar ka jingduna jong ki jingthih ha ka jaka sumar kaba don ha skul bah NEHU la hap ban pynthiang lang lai ngut kiba kem tlot ha ka juh ka jingthiah, ia kine kiba kem tlot dei kiba la rah mynta ka sngi.
Mynta ka sngi ki nongtrei bala shong thiat ka skul bah NEHU kila wan ban jngoh ia ki samla pule kiba dang bteng ia ka jingiakhih jong ki da kaba shah thgnan ban dawa ia kaei kaba ki samla pule ki kwah.
