Shillong, Naiwieng 16: U Myntri Rangbah ka jylla u Conrad K Sangma u la iathuh ba mynta ka sngi ha ka jingialang jong ka kabinet kala shim ia ka rai banpynkylla ia ka Meghalaya Physical Responsibility and Budget Management Act, 2006, la ong ba ha u snem 2022 ruh la wan rah ia ka jingpynkylla ha kane ka ain.
U Myntri rangbah la ong ka jingwan rah ia ka jingpynkylla ha katei ka ain ka long ba ka sorkar pdeng kala shah ia ki sorkar jylla ban pynkiew ia ka jingmang pisa da kaba shimram bad kane ka long halor ka nongrim iaki rukom pyntreikam ha ki tnad sorkar bapher bapher.
La ong ba wat ha u snem ba la dep la shah ia ka jylla ban shimram haduh 4%, bad mynta u snem na ka jingshim ia ka rai ban wan rah ia ka jingpynkylla ha kaba ia dei bad ki kam bor ding kumta la shah ia ka jylla ban pynkiew ia ka jingshimram da 0.5% kumta la don kam ban pynkylla ia kane ka ain.
Ha kane ka jingialang ka kabinet kala shim ia ka rai ruh ban pynkylla kyrteng ia ka tnad Labour namar ka jingmut jong kane ka tnad ka long kaba iar haduh katta katta.
Namar kam dei ba ka peit tang ia ki kam bylla hynrei ka peit ruh ia kiwei ki kam kiba ia dei bad ka lat ai kam ai jam bad kiwei ki kam pyntbit kyrpang.Kumta la shem ba ka long kaba biang eh kumta la shim ia ka rai ban jer kyrteng noh kum ka “Labour Employment and Skill Development” Department.
