Shillong, Naitung 15: U MLA ka Nongpoh Bah Mayralborn Syiem mynta ka sngi ka 15 tarik u Naitung 2024 ula leit ban ia kynduh ia u Chairman ka District Selection Committee (DSC) ka Ri-Bhoi District ba un pynmih noh ia ka result jong ka DSC bala dep thoh eksam naduh u snem 2020-21.
U MLA ula iakynduh markhmat ia u Chairman ka DSC uba dei ruh u Deputy Commissioner ka District Abhilash Baranwal, bad iakren halor ka jingpynrungkam ia ki samla na Ri-Bhoi ha ki kam bapher bapher ka DSC.
Ha kane ka jingialang la wan ban iadonlang, ki kynthup ia u Raja Braha ADC, uba dei u Member Secretary ka DSC, u MDC ka Nongpoh Bah Balajied Rani bad u Bah Pul Star Nongrum, Dkhot ka DSC.
Haba ioh ban ia kren bad ki nongthoh khubor na ka liang u Bah Mayralborn ula iathuh ba bun ki samla kila khmih lynti bad lynga mynsiem ha ka jingap ia ka DSC ban pynbna noh ia ka result thungkam kaba la dep pynlong eksam naduh u 2020-21.
Ula pyntip ba ula tynruh ia u Chairman ka DSC ba u dei ban pynmih noh ia ka result la kumno kumno ruh hapoh u bnai Nailar lane ha u bnai Nailur.
Nalor kane, ula pyntip ruh ba ula iakren halor ki kam kiba lait thylli hapoh ka District bad ong ba hadien bala dep pynbit pynbiang ia ka Roster System, ki bor District ki dei ban pynmih jingpynbna noh ba lait kine ki kam khnang ba ki samla kin ioh ban thep bad rung kam.
Une u Bah Syiem ula kyntu ruh ia u Chairman ka DSC ban iarap kyrpang ha kaban thungkam ia ki trai shnong ka Ri-Bhoi bad pynpaw ia ka jingkwah ba ha kiba bun ki kam ba lait ha Ri-Bhoi, dei ban ioh da ki samla kiba dei na Ri-Bhoi.
U la ong ruh ba ki lah ban dei u Khynriam, u Par, U Bhoi lane u War bad kiwei kiwei hynrei ki dei ban dei ki kiba shnong shnong ba pura jong ka Ribhoi.
