Shillong, Naiwieng 29: Mynta ka sngi katto katne ngut ki samla kiba la ngop ha ka dih drok kiba la leit ban shah sumar ha Alive Again Foundation, ha Assam mynta ka sngi ki leit ban ujor pyrshah sha ka Alive Again Foundation sha ka Meghalaya Human Right Commission (MHRC).
Ha kane ka jingleit ujor sha MHRC la synranlang ia ki da kiba ha iing ha sem jong ki, na kiba ha iing ki leit ban buh ha katei ka jaka iaki khun kiba la ngop ha ka jingdih drok ba kin kylla bad lait na kane ka jingdih drok bad ba kin ioh ia ka met kaba koit ba khlian.
Kaba sngewsih pynbna ban tip kumba kala paw pyrthei ha kine ki khyndiat sngi kumba la paw na ki pat pathai khubor kila kynnoh ia ka jingshah ban bein kiba shah sumar ha katei ka jaka kaba don ha Assam, kawei ka Alive Again Foundation, ka Better Living Wellness Foundation bad ka Ajoy Foundation ïa kiba la long trai da u Bah Arup Passah.
La kynnoh ba kila don ki jingjia kiba sngewshyrkhei bha namar hapoh kine ki ‘Rehab Centre’, kitei ki samla ki lah shah lehbeiñ haduh katta-katta ha ryngkat ka jingbom-jingtied bad ka kynnoh tad haduh u pud ba ki don napdeng jong ki, kim lah shuh wat ban ïaid-ban îeng ruh.
Haba kren ha ki lat pathai khubor ki katto katne ngut ki samla ki samla kiba la shah sumar ha kitei ki ‘Rehab Centre’ kiba la wan mih mynta ka sngi shapoh ka Meghalaya Human Rights Commission ban ujor pyrshah ïa u trai jong kitei ki Rehab, ki la pynpaw ba ka jingshah lehbeiñ jong ki hapoh kitei ki jaka sumar ka la long kaba shyrkhei bha ha kaba ki ju shah bom-shah tied.
Kitei ki samla ki la ïathuh ba kitei ki briew kiba ju khmih ïa ki hapoh katei ka ‘Rehab Centre’ ki ju phah thok bad byrngem ïa ki lada ba wan kino-kino ki briew nabar katei ka ‘Rehab Centre’, ki dei ban thok bad ba kim dei satia ban ïathuh hok ïa kaei kaba ki ju shah leh hapoh katei ka ‘Rehab Centre’ lym kumta kin ngat ha ka jingshah pynshitom kaba jur bha.
