Shillong, Nailur 4: Mynta ka sngi ar ngut ki dkhot ka seng Hynniewtrep Integrated Territorial Oerganisation (HITO) kila shah khot hajir ha ki pulit jong ka Sardar Police Station, naduh ka por ba ki leit ki dkhot ka seng kila leit da ka kynhun da kaba rah ia ki lama jong ka seng haduh khynrdop jong ka tei ka police station.
Ha dien ba la dep ka jingsha hajir ha ki pulit jong ka Sardar Police Station ki dkhot jong ka HITO kila kiew da ka jingthmu ban leit tur sha Secretariat ban leit bret ia ki plakard kaba kila thoh ban pynrem ia kane ka jingshah khot hajir,
Ki dkhot ka seng ha ryngkat ki jingiaid kila pyrta ha surok bad ynda poi ha jan ophis jong ka Deputy Commissioner jong ka East Khasi Hills District ki pulit kila khang lynti ha kaba kala mih ka jingiakren hynrei ki pulit ki khlem ailad ba kin tur sha khmat bad ki dkhot ka seng ruh kila ialeh pyrshah.
Haba ia ioh ia kane ka jingleh pyrshah ki dkhot ka seng ki pulit kila hap ban pyndon kam ia ki Lathi ban pynpra ia ki na katei ka jaka ki pulit kila hap ban sait jingpynsat khmat bad beh kthong ia ki na katei ka jaka haduh ban da poi sha jaka iing kali pyrshah State Bank ka Ri India.
Ha kane ka jingjia bun kila mynsaw bad ki dkhot jong ka seng ruh kila shah tan bad sha bom ha ki pulit, kat hduh ba thoh ia kane ka khubor ym pat lah ban tip katno ngut ki dkhot ka HITO kila mynsaw bad shah tan ha ki pulit bad ympat lah ban ioh jigntip ruh katno ngut ki pulit kila mynsaw ha kane ka jingialeh markynti.
