Shillong, Risaw 04: Mynta ka sngi ka kynhun na Meghalaya bad na ka jylla Assam kila leit ban jurip lang ia ka thain Langpih ban ia pynbeit ia u pud u sam ha pdend kine ki ar tylli ki jylla bad ban ia kynduh ia ki briew kbia don ha ki shnong ha katei ka thain.
Na Meghalaya la ialam da u shongknor ka “District Boundary Committee” u bah Reniktone L Tongkhar ba dei ruh u myntri ka sorkar Meghalaya, la don u bah KP Pangniang, bah Kimfa S Marbaniang, bah Gigur Myrthong, DC ka west Khasi Hills bah T. Lyngwa bad kum juh kiba na Assam.
Ki shnong kiba kane ka kynhun mynta ka sngi kila leit ki long ka Hahim, Aradonga, Tuhiapara, Malang, Salbari bad Athibari, ha kane ka jingleit la don ruh ia ka jinjgialang paidbah ban ia kynduh ia ki nongshnong shnong da ki heh sorkar na Meghalaya bad Assam.
Lah ban pynkymaw ba ki dkhot na kane ka jylla Meghalaya kila leit sha Assam ha ka sngi u blei ban ia kynduh ia ki bor jong ka Kamrup District bad mynta ka sngi kila leit bania leit lang sha madan ban peit bad ban ioh sngew ia kaei kaba ki paidbah ki don ban kren ha kane ka jingiakren pynbeit pud ha kadeng ka jylla Meghalaya bad Assam.
Kane ka jingleit sha katei ka jaka ka long ba katei ka thain Langpih kadei ka jaka ba don ka jingiakajia pud la bun bun snem mynta bad ka sorkar Meghalaya bad Assam ruh kila shim ia kane ka jaka kum kawei kaba dei ban ia pynbeit hapdeng kine ki ar tylli ki jylla.
