Shillong, Naitung 29: U MLA ka Mawkynrew Constituency, u Bah Banteidor Lyngdoh uba dei ruh u Myntri Sorkar ba dei peit ia ka tnad Agriculture, Sports ha ka sngi Ba-ar u la leit ban jngoh ia ka St Joseph’s H
ealth Care kaba don ha Mawkynrew kumjuh ia Holy Cross Secondary School.
Kane ka Health Care ka dei kawei ka jaka kaba ju ai jingsumar ia ki paidbah nongshong ka thaiñ. Ha kane ka Health Care, u MLA kum ka jingai jingïatreilang u la ai ki Thermal Scanning Kit, ki hand sanitizer, ki face mask bad kiwei kiwei ki tiar iada COVID-19.
Kham hadien u Myntri u la leit jngoh ruh ia ka jingpyntrei kaba dang iaid sha khmat ia ki kamra klas kiba u la noh synniang na ka skhim MLA.
Kiwei kiba la ia donlang ki kynthup ia ka Sister Mary Kochup (Doctor), u Fr Anthony Joseph, Parish Priest Mawkynrew, Fr John Valan, Principal Holy Cross Secondary School, i bah Wesslington Mynsong, Secretary Parish Pastoral Council, u Bah Dengbok Kurkalang, u Bah Donbok Lynshiang bad kiwei.
U Bah Banteidor u la ong ba kane ka jingwan jngoh jong u ka long ban ai mynsiem na ka bynta ka jingshakri ba bha ka Health Care bad u la kyntu ia ki nongshong shnong ban nym don ka mynsiem tieng ia ka jingpang COVID-19 hynrei ban phikir bad ia khun pyrshah ia ka da ka jingsngewthuh bad jingshemphang.
U la ai ka jingīaroh ia ki bor pyniaid ka Health Care kaba la noh synniang shi katdei eh sha ki paidbah nongshong shnong ka thaiñ ha kaba ia dei bad ka jingai sumar ne ki dawai na ka bynta ka pang ka shitom. U la ban jur ba da ka jingïatreilang hi lah ban pynurlong ia kino kino ki bynta jingtreikam.
Na ka liang ki bor pyniaid skul bad kane ka Health Care ki la pynpaw ka jingai khublei ia u MLA uba ju iai ia donlang bad ki na ka por sha ka por bad uba la kloi ban kner ia ki kti jingïarap la ka long ha kano kano ka bynta ruh.
Hadien kane, u Myntri u la hiar sha shnong Mawlat ha kaba u la leit ban jngoh bad ai jingïarap ia ki ba sah ha ki Quarantine Centre kane ka shnong ha ka jingiadonlang u Bah Moron Suting, Sordar bad Secretary ka Shnong Mawlat.
U la leit ruh ban jurip bniah ia ki iing kiba la shah ktah na ka jingtwa khyndew kaba la jia na ka jingjur palat u slap bad ki jaka kiba la shah ktah ha ki bor mariang kum ki iing briew, ki lynti syngkien bad surok khnang ban ïoh leh ia kaba donkam na ka liang jong u kum u nongmihkhmat.
Ha kane ka sngi ka la don ruh ka jingsynreit dawai ban iada ka khlam COVID-19 ha ki jaka ba pyndonkam paidbah ha ka shnong Mawlat.
