Shillong, Jymmang 13: Ka jingialang jong ka kabinet kaba la long mynta ka sngi kala shim ia ka rai ban wan rah ia ka jingkylla ha ka Agricultural Marketing Act 1918. Kane ka dei ka ain jong ka sorkar pdeng hynrei namar ba ka don ha ka concurrent list ka sorkar jylla ruh ka don ia ka bor ban kren.
La iathuh ba ia kane ka jingkylla yn sa wanrah ha kane ka dorbar mang tyngka ban sdang ha ka 20 tarik mynta u bnai bad ha dien ba ka iing ka sorkar kala pdiang ia ka kin phah sha ka sorkar pdeng ban ai ia ka jingmynjur jong ka sorkar pdeng.
Ka jingthmu ban wan rah ia ka jingpynkylla ha kane ka ain ka long ban thaw shuh shuh ia ki iew dielang na ka bynta ki nongrep, kumba ka long mynta ka jylla ka don tang ar tylli ki Iew dielang ka Mawiong ha East Khasi Hills District bad Garobada ha West Garo Hills District.
Ka Kabinet mynta ka sngi kala kala shim ia ka rai ruh ban wan rah ia ka jingpynkylla ha ka Labour Act, Industrial Dispute Act bad ia ka Contract Labour Act. Ia kine ki jingpynkylla yn sa rah ha kane ka dorbar mang tyngka ka ban long ha ka 20 tarik mynta u bnai ha iing dorbar.
