Khliehriat, Nailar 29: Ka Shlemirnia halor ka mat ‘Im ka ktien, im ka jaitbynriew’ ba la pynlong da ka Jaintia Eastern College, Khliehriat ha ka 25tarik August, 2018 kum shi bynta ban pynkhlaiñ shuh shuh ia ka jingdawa ban ïoh jingithuh ha ka Khyrnit Baphra jong ka Riti Synshar ka Ri India.
U kongsan ha ka shlemirnia, u Bah B Kharchandi, ADM, Kong Violet Lyngdoh, MDC bad kiwei kiwei ki kynrem lyndan kynthup u Khliehduh ka Synjuk Ki Nongthohkot Khasi, ka Khasi Authors’ Society, Dr D R L Nonglait, bad ki nonghikai bad samla pule na ka thaiñ. Ha ka jingkren kum u Kongsan, u Bah Kharchandi u la bynñiaw ia ka jinglong jingman ha jylla khamtam ha nongbah Shillong ha kaba ki paidbynriew Khasi ki kham lmun ban kren phareng, wat para Khasi ruh.
U la dumok ba dei ban kylla noh shisyndon kane ka jingmlien bad ba dei ban sarong ban kren da ka ktien lajong. Ka kongsan symbud Kong Violet Lyngdoh ka la bankhia ha ka ba dei ban ñiewkor ïa la ka ktien, da ka ba ka la pyni nuksa ban kren da ka ktien Pnar. Ka la iathuh ruh ba wat ki para Khasi na sha shiliang duriaw ruh ki dang nang tiak tiak ban kren Khasi bad ki thrang ban pule shuh shuh ïa la ka ktien kmie. ÏA ka shlemmirnia la kren maitrphang da u Dr D R L Nonglait, Khliehduh, Khasi Authors’ Society.
Ha ka lyngwiar ïatai jong ka shlemirnia, u Dr Kynpham Sing Nongkynrih u la batai bniah ia ka khana pateng shaphang ki lyngwiar ktien ha ka thup Austro-Asitic, da ka ba u la kham batai bniah shaphang ka ktien Monkhmer, ha ka ba ka ktien Khasi ka dei kawei na ki ktien shnat bah. U Bah Kynpham u la kdew ruh da ki jingtip ba la tih bniah da ki riewstad na ka Indian Statistical Institute bad Centre for Cellular Molecular Biology, ba ki paidbynriew Khasi ki lah im ha kine ki thaw naduh kumba 56000 snem mynshwa.
Kiwei kiwei ki longsan ba la kren ha kane ka shlemmirnia ki long u Bah A Wankhar na St Anthony’s College bad Kong Soloni Bareh na Nongtalang Government College. Ha ka kylla miet jong ka shlem-mir-nia la don ka ka jingtainia bad mir jingmut halor ki bun ki bynta jong ka ktien Khasi, khamtam ha ka ba ïadei bad ka jingdawa ban ioh jingithuh ha ka Khyrnit Baphra jong ka Riti Synshar Ka Ri India.
