New Delhi, Jymmang 7:
La lap ba ki don ki por haba ki briew ki la book ia ka por ai dawai COVID lyngba ka rynsan CoWIN bad ki khlem leit ai dawai ha ka por ba la buh hynrei ki la ioh ia ka SMS ba ki la ioh dawai.
Haba peit bniah ia kane, la lap ba kane ka dei namar ki nongai dawai ki la thoh ba kine ki briew ki la ioh dawai kaba long ka jingbakla ha ka data entry da ki nongai dawai.
Khnang ban pynduna ia kum kine ki jingbakla bad ka jingeh ba ki briew ki shem hadien kane, ka rynsan CoWIN kan wanrah ia ka bynta kaba thymmai kaba long ka ‘4 digit security code’ ha ka CoWIN app naduh ka 8 tarik u Jymmang, 2021.
Mynta, hadien ba la dep pynshisha, lada lap ba u briew u dei ban ioh dawai, shuwa ban ai dawai COVID ia u, u nongai dawai ne u nongpynshisha un pan ia kane ka 4 digit code bad pyndap ia kane hapoh ka rynsan CoWIN ban pynshisha ia ka jinglong jingman jong ka jingioh dawai une u briew.
Kane kan trei kam tang ia kito ki briew kiba la book online ia ka jingioh dawai. Ia kane ka ‘4 digit security code’ yn shon ha ka kot ba pynshisha ia ka jingbuh por ban ioh dawai bad u nongai dawai un ym tip ia kane.
Ia une u code yn phah ruh lyngba ka SMS sha kito kiba dei ban ioh dawai hadien ba la dep ban buh por ia ki ban ioh dawai. Lah ruh ban buh ia ka jingpynshisha jong ka jingbuh por (Appointment Acknowledgement Slip) ha ka mobile ban pyni ha ki jaka ai dawai.
Kane kan pynthikna ba ka jingkyntiew jingtip shaphang ki briew kiba la book online lypa ia ka por ai dawai bad ki jingtip shaphang ka jinglong jingman shaphang ka jingioh dawai jong ki ka long kaba lait na ki jingbakla.
Kan pynthikna ruh ba tang kito kiba la buh por lypa lyngba ki kam online kin ioh dawai ha ki jaka ba ki dei ban ioh. Kane kan pynlait na ka jingeh kaba mih haba ki briew ki thok kyrteng khnang ban ioh dawai bad ka jingpyndonkam bakla ia ki lad ki lynti hapoh ka rynsan CoWIN khnang ban ioh dawai.
La ai jingmut ia ki paidbah ba kin rah ia ka copy (digital lane ka kot) jong ka appointment slip lane ka mobile phone jong ki ha kaba ka don ka SMS ba pynshisha ia ka jingbuh por lypa, khnang ban lah ban ioh suk ia u 4 digit code khnang ban iaid beit ka kam ai dawai.
La ai jingmut ruh ban ai ia u 4 digit code sha ki nongai dawai shuwa ban ioh ia u dawai. Kane ka long kaba donkam namar ia ka certificate yn pynmih hadien ba la ai dawai. Ki briew ki dei ban ai u 4 digit code sha ki nongai dawai namar yn ioh ia ka certificate hadien ba la kyntiew jingtip ha ryngkat une u security code.
Ki briew ki dei ban ioh ia ka SMS hadien ba la dep ka kam. Kane ka SMS ka pyni ba la dep ia ka jingai dawai bad ba la dep pynmih ia ka certificate. Lada ym ioh ia kane ka SMS, dei ban iakren bad u nongai dawai ne u briew ba dei ban peit ia ka jaka ai dawai.
