Shillong, Jymmang 12: ka jingialang jong ki kynhun myntri kaba la long mynta ka sngi kala ia kren bha kumno ban pynbiang ia ki jingdukan ia ki tyndong Oxygen ha kane ka jylla ha kane ka por ba dang ia khun pyrshah ia kane ka jingpang COVID-19 ha ka jylla.
U Symbut myntri rangbah ka jylla la ong ba nalor ba ka sorkar jylla kan ioh ia ki jaka pynmih oxygen na ka sorkar pdeng, ka sorkar jylla ruh kan thied ia la ki jong ki kor pynmih Oxhygen kiba shong dor hapdeng T.20 lane 25 lak tyngka kawei kawei ka mashin.
Ka jingpynkhreh ka sorkar ia kane ka long ban peit ba kan nym don kano kano ka jingduna Oxygen ha ka jylla Meghalaya, la ong kumba ka long mynta ka jingdon ki tyndong Oxygen ha ka jylla ka biang bad ka ruh ka jingiakynduh bad kiba pyniaid ia hospital mar ka ar sngi ban peit ba ki lat jingsumar kin biang.
Haba jubab ia ki jingkylli haba ia dei bad ki doctor, na ka liang jong u Director ka tnad ka koit ka khiah u Dr Aman War, u la ong ba ki doctor kiba sumar ia ki nongpang COVID-19 kim leit ban sumar ia ki wei pat kiba pang, lait noh tang kito ki doctor Specialist lada don kam, hynrei lada ki leit ruh kila pynbiang ia lade ba kan nym don ka jingiajan bad kiba shitom.
