Shillong, Lber 31: Ban pyniaid sha khmat ia ka jingtreikam jong ka Invest Meghalaya Authority ka sorkar jylla kala pynlait ia ka pisa T.20/- klur tyngka na ka bhah pisa jong ka jylla na ka bynta ban pyniaid sha khmat ia kane ka ophis treikam.
Kane ka pisa ka long ban pynbha ia ka ophis, ban thied ia ki kali, ban siew ia ka tulop jong ki nongtrei bad kiwei kiwei ki jingdon kam jong ka ophisa kiba man ka sngi bad ka thong ka long ban khring ia ki briew ban wan bei tyngka sha kane ka jylla.
Ka iing dorbar thawain ka jylla kala pynlait pisa T.20/- klur sha ba ka IMA kan shimwai ia ka jaka jong ka GHADC na ka bynta 99 snem ha West Garo Hills District ban long kum ka jaka ban buh ia ki karkhana, ka jingeh jong ka jaka kaba la shim na ka GHADC ka long 634 akar.
