Mawkyrwat, Nohprah 07: Kum ka jingpynkhreh ia ka election sha ka iing dorbar thawain ka jylla kaba khyndai kaban long ha u snem 2013 u Bah A Mawlong mynta ka sngi u la khot ia ka jingialang jong ki heh sorkar jong ka District baroh kawei na ka bynta ban ia kren ia kane ka kam.
Ha kane ka jingialang kiba la ia don ki long u Superintend jong ki pulit u Bah S Nongtynger bad kiwei kiwei ki heh sorkar ki la ia don lang ban ia mir jingmud na ka bynta kane ka kam. Ka jingialang ka long kaba kyrpang namar ba kane ka dei ka sien kaba nyngkong kum ka District kan pynkhreh iaka election.
Ha ka jingkren jong u DC u la ong ba ka long kaba don kam ban pynkhreh namar ka long kaba eh ban pyniaid ia ka election wat la kane ka District kaba thymmai ka don tang ar tylli ki constituency ka Ranikor bad ka Mawkyrwat.
Haba ia dei bad ka jingiaid beit iaid ryntih ka election u la ong ba kum u ophisar kiba dei ban pyniaid ia ka election ki dei ban long kiba don ia ka jingkit khlieh khang ban dup lah ban pynlong ia ka election kaba iaid beit iaid ryntih.(SP News)
