Shillong, Kyllalyngkot 30: U Myntri Rangbah ka jylla u Conrad K Sangma mynta ka sngi u la plie paidbah ia ka jaka pynlang um kaba la shna ha shnong Mawrah kaba don hapoh jong ka Sohra Civil Sub Division ha Est Khasi Hills District.
Kane ka nan kaba la shna ban pynlong ia ka um, ba ia kane ka um lah ban pyndon kam ha kiba bun ki liang, haba kren ha ka jingplia ia kane ka nan u myntri rangbah ka jylla u la ong ba ha kine lai snem ban wan ka sorkar kan pynlut haduh T.400 klur tyngka ban tei ia ki jaka pynlang um.
Ba pynneh pynsah ia ki um ki wah ka dei ka bynta kaba ha khmat eh jong ka sorkar , la ong ba tang kumba 4% lane 5% la lah ban pynneh ia ka um slap kaba ka jylla ka ioh, hynrei baroh ka um ka tuid sha Bangladesh bad ka jylla ba marjan. Ka jingtei ia ki jaka pynlang um ka dei ka lat ban pynneh ia ka um.
U myntri rangbah ka jylla u la ong ba kane ka jaka pynlang um kaba la dep ban shna ha shnong Mawrah ka dei ka jaka ba lah ban pyndon kam ha kiba bun ki liang, kum ka jaka ri dohkha, jaka jngohkai pyrthei bad ban kyntiew iaka rep ka riang.
Kane ka jaka pynlang um hapoh ka shnong Mawrah ka dei kaba la pynwan dur ha u snem 2021 bad ia ka jinglut na kane ka skhim la bei pisa na ka NABARD kabala kot sha ka T.1.50 klur tyngka, la pyndap ban pyndep ia kane ka jingtei na ka pla pisa jong ka sorkar bad kum juh na ka Meghalayan Age Ltd ban shna ia ki lynti bad ki jaka niah lieng.
Ia kane ka nan la shna ha kata ka rukom jong ka ryntih ba kan skhem ka kynroh jong ka nan bad ka jingiar kane ka jaka ban pynlang ia ka um ka long haduh &.7 Hakter lane 19 haduh 20 akar bad ka um kaba lah ban pynlong ha kane ka jaka kan long haduh 528 million litter bad kane kan lah ban ai um ia bun ki shnong.
U Myntri rangbah u la pynbna ruh ba ia ka surok na na surok bah Sohra sha ka shnong Kongthong ka ban long 25 km yn siang rong noh na ka skhim PMGSY bad ia kane lah ban pyndep ha u Kyllalyngkot 2025 bad kane kan long ka jingkyrkhu ia ki paidbah ka thain.
Kiwei ki myntri sorkar kiba la ia don lang ki long ka Dr. Ampareen Lyngdoh, u Marcuise M Marak, u bah Gavin Mylliem MLA ka Sohra, ha kane ka sngi la sakhi lang da ki paidbah ka shnong ia ka jingplie ia kane ka jaka pynlong um.
