Shillong, Nohprah 19: Ka Confederation of Meghalaya Social Organisation (CoMSO) mynta ka sngi kala pynlong ia ka jingtied ia ki Bom ha jaka ieng kali Jaiaw, ha Motphran ban pynsgew sha ka sorkar pdeng sha Delhi ba ki paidbah jong ka jylla Meghalaya ki dawa ban pyntrei kam ia ka Inner Line Permit ban iada na ka jingwan tuid ki poiwir sha kane ka jylla.
Ka jingpynlong ka CoMSO ia kane ka jingtied Bom ha Motphran mynta ka sngi ka long ban pynpaw ia ka jingsngewsih ba wat la ka iing dorbar thawain ka jylla kala pdiang ia ka rai ban pyntrei kam ia ka Bengal Eastern Frontier Regulation 1873, kaba mut ka ILP ha kane ka sngi ha u snem 2019 hynrei ka sorkar pdeng mynta la shisnem ka sngap mynthi.
Ha ka jingkren jong u bah Robertjune Kharjahrin shongknor jong ka CoMSO u la ong ba ka jingiakhih nangne sha khmat ha ka snem thymmai ban wan kan dang iai bteng katba ka sorkar pdeng kam pat ai ia ka ILP ha kane ka jylla Meghalaya.
Haba ia dei bad ka jingwan jong u MLA ka Congress na Assam u Kamalakhya Dey Purkayastha ban ai ia ka jingthoh sha ka u myntri rangbah ka jylla ban ong ban da pyrkhat ar sien ha kaba ia dei bad ka jingpyntrei kam ia ka ILP ha kane ka jylla, ka CoMSO ka dawa na ka MPCC ba dei ban thoh sha ka ACCC bad sha ka AICC ba u tei u MLA u dei ban weng noh ia ka shithi.
Kumba ka long haduh mynta na ka liang jong ka Congress ha Meghalaya kam shym la leh ei ei ha kaba ia dei bad kane ka jingwan tuklar u MLA ka Congress na Assam, haba kumne kumno yn shaniah ia ka party Congress, lada ka Congress ka kyrshan pura ia ka jingdawa ILP ka dei ban dawa na u tei u MLA ba u dei ban weng noh ia ka shithi.
Ha ka juh ka por u bah Robert u ka ong ba kane ka jingleh jong u MLA ka Congress na Assam ka long pyrshah ia ka rai jong ka iing dorbar ka jylla Meghalaya bad la kyntu ia u lamphang ka iing dorbar ba dei ban leh ei ei ia u lem kumta dei ban weng noh ia ka bynta ka rule kaba ia dei bad ka jingkren pyrshah ia ka iing dorbar.
Halor kito ki nongkynthoh kiba ong ba don leh aiu ia ka ILP haba la don ki District Council, ka Land Transfer Act, u bah Kharjahrim u phah ia ka khubor sha kito ki briew da kaba ong haba ki dang duna ka jingtip bad ka jingiohi jngai wat batai stad bad u kloi ban ia tai bad ki halor kane ka bynta.
La ong ba ia ka Sixth Schedule bad ia ka Land Transfer Act act dang lah ban pynkylla lada la bun kiwei ki jaidbynriew kum ki nongmih khmat, kine ki ain kin dang neh katba ia u lakam synshar dang bat hi da ki trai jylla, u la ong ba ka CoMSO ka daw ia baroh ki 60 ngut ki MLA ba kin leit sha Delhi ban dawa ia ka ILP ban pynthikna ba ka sorkar pdeng kan pyntrei kam ia ka ILP ha kane ka jylla Meghalaya.
Na ka liang jong ka CoMSO ka kitbok ba u myntri rangbah ka jylla ba un ioh noh ia ka jingkoit jingkhiah ba un dup lah ban leit sha Delhi ban ialam ia ki MLA baroh ban dawa ia ka ILP na ka sorkar pdeng ban pynthikna ba ia ka ILP dei ban pyntrei kam ha kane ka jylla Meghalaya.
Kiwei ki nongialam ka CoMSO kiba la kren ha kane ka jingpynshai paidbah halor ka nongrim ba ki dawa ia ka ILP ki long u bah Donbok Kharlyngdoh, na ka HYC, u bah Arphul Kharbani, u bah Lamphrang Kharbani na ka HANM, u John D Sangma na ka AKHAF bad kiwei kiwei ki nongialam, kine baroh ki nongkren kila pynpaw ia ka jingdon kam ban don ia ka ILP ha kane ka jylla Meghalaya.
Kum ka dak jong ka jingpyrshah ia ka jingkuman ka sorkar pdeng ban pyntrei kam ia ka ILP ha kane ka jylla Meghalaya ka CoMSO kala thang ia ka tynshop jongu myntri rangbah duh ka Ri, ia u myntri kampoh ka iing ka Ri bad kum juh ia ka tynshong u MLA Congress na Assam ba u la wan ban tuklar ha kane ka jylla Meghalaya.
