Shillong, Iaiong 10: Daka jingsngewkhia halor ka jingkynrei jong u drok bad ka jingkyrni dih drok hapdeng ki samla jongka Thain khamtam ka jingsdang suhthied ha iew Mawkyrwat katba dei ruh ka District Headquarter jongka South West Khasi Hills District, Ka KSU Mawkyrwat Circle kan pynlong daka jingiaiaid paitbah bad ka jingialang paitbah haka 25/4/19 naduh ka por 10:00am mynstep.
Ia kane ka jingiaid paitbah yn sdang na lad ophis Mawkyrwat C&RD Block bad yn pynkut daka jingialang paidbah ha iew Mawkyrwat. Ka seng ka la rai ban pynlong ia kane hadien ba ka la lap iaka jingkynrei jong u drok hapoh ka thain kaba la pynjot ia shibun ki samla bad ki longing longsem hapoh ka Thain.
Ka seng ka khot sngewbha iaki long kmie ki long kpa, ki para samla, ki Sengbhalang bapher bapher , ki skul, college, ki nongialam shnong bapher bapher kiba don iaka jingsngewkhia bad jingkit khlieh halor ka jing jyllei jong u drok ban ia mih ryntih halor ha kato ka sngi kaba Long kum shibynta ban pynsngewthuh paitbah bad ban kyntu ia ki bor ba dei khmih ban shimkhia halor kane ka mat.
Kane seng lyngba kane ka kyrwoh ka maham ruh ia kito kiba ju mlien ban kyrshan pisa iaki nongkhaii drok bad kumjuh ruh ia baroh ki nongkhaii drok kiba ju mlien ban pynngop iaki samla hapoh jongka Thain haka jingteh jingkhum jongka jingkyrni dih drok.
Ka seng kan nym shongthait halor kane ka bynta bad kum ka seng ngim don kano kano ka jingkynran dien haki jingshah pyntieng koh tympan. Ka KSU kala rai ban iaid beit shakhmat iala ka bynta kampher la ka long da kano ka lynti ruh.
Kane seng ha kajuh ka por ka pynpaw iaka jingsngewkhia halor ka jinglehsting palat jongki bor district ia kane ka mat kumba ka la jia haka por ba kem nongkhaii drok ha shnong Nonglang ha kaba watla ka jingjngai ka long tang 2 kms na District Headquarter hynrei ka shimpor pat haduh 4 kynta ia ki bor district bad wanpoi bad leh ia kaba donkam.
Ka KSU ka kwah ban iohi iaki bor sorkar ba kim dei ban kren tang ka ktien ba ki pyrshah drok hynrei ki dei ban pyni ruh daka kam khnang ba kin ioh ka jingshaniah na uba bun ba lang namar kumba Long mynta lait naka seng bad ki seng samla shnong ym pat iohi shisien ruh ba ki bor sorkar ki la iohkem nongkhaii ne nongdih drok hapoh ka Thain.
Ka por ka dang biang bha ban ngin kyndit noh nakine ki jingma kiba ap iaka lawei jong kari bad ka jaidbynriew.bad kum ka dong ka thain ngi donkam iaka jingialong kawei bad ka jingiamih ryntih haka kam jong baroh ki nongialam shnong, ki seng samla shnong, VDP, Seng Longkmie Shnong bad kiwei kiwei. Ka kyrwoh ba la phah da u samla Rutherford Lyngdoh, General Secretary, KSU Mawkyrwat Circle.
