Shillong, Jylliew 22: U myntri ba dei peit ia ka tnad Social Welfare u bah Kyrmen Shylla u la ong ba ka dei ka jingshisha ba ki briew jong ka thain Sammasi, Kesh bad kiwei ki nongialam shnong katei ka thain kila ia kynduh ia u ha kaba ia dei bad ka jingkwah jong ki ban siangrong ia ka surok na Sammasi sha Muknor.
Haba kren ha u SP News Agency u bah Shylla u la iathuh ha ka por ba ki briew katei ka thain ki wan ban ia kynduh ia u u la kren shai ba ka jaka kaba u mih khmat ka Khliehriat ruh ka dang don kam shibun ki kam pynroi, katba katei ka jaka kam hap hapoh ka jongpeit jingkhmih ki jong u.
La iathuh ba ha kane ka jingiakynduh bad ki nongialam shnong u la pynsngew ha ki ba un sa pyrshang ban ia kren lem ia kane ka jingeh jong kitei ki paidbah ka thain ha ka sorkar namar ki paidbah ka thain kila ia kynduh jingeh shisha ha kaba ia dei bad katei ka surok.
La iathuh ba na ka liang jong u u la pynkren lem ia kane ka kam ba lada ka don ka lat ba ka sorkar kan pynrung skhim ia kane ka surok lyngba ka PMGSY khnang ba ki paidbah katei ka thain kin suk ha ka leit ka wan namar ka surok ka dei kaba la slem shisha kala don kam ban leh ei ei na ka bynta ka jingmyntoi ki paidbah katei ka thain.
