Shillong, K. Lyngkot 26: Ka Khasi Students’ Union (KSU) lyngba kane ka kyrwoh khubor ka pynpaw ia ka jingpyrshah jur halor ka jingthmu ka sorkar ban ailad biang ia ka North East Frontier Railways (NFR) ban sdang ia ka jingtrei ban shna ia ka lynti rel ha Byrnihat.
Katkum ka jingiohi ha kawei ka kotkhubor mynnin ka sngi ba ka sorkar jylla lyngba u bah Prestone Tynsong ka la ai bor ia ki bor pyniaid district ka Ri Bhoi ban pynbeit bad ka NFR ia kane ka jingthmu ban sdang biang ia ka jingtrei shna lynti rel, ka KSU ka pynpaw ia ka jingkyndit bad jingbitar halor kane ka rai jong ka sorkar.
Kumba la tip ba ka mat lynti rel la pyrshah jur da ka KSU naduh u snem 1989 hapoh ka jingialam i bah Bull N Lyngdoh kaba la ioh ia ka jingkyrshan kaba pura na ki paidbah bad ka dang iai bteng hi haduh mynta namar la tip shai ba khlem kino kino ki aiñ ba pyrkhing bad ba khlain ban teh lakam ia ka jingbuhai shnong ki mynder, ka rel kan dei ka kabu bad ka lad ka ban pynsuk ia ki mynder ba kin wan buhai shnong hapoh ka Bri U Hunniewtrep.
Ka jingleh kyrkieh jong ka sorkar ban shim ia katei ka rai ka pyni ba ka thrang hir hir ban wanrah ia ki mynder sha jylla bad ba kam don jingkitkhlieh ia ki trai ri trai muluk namar kam ju shim rai syndet ne kyrkieh ha kaba ia dei bad ki ain ne ki lad ban iada ia ka Jaidbynriew na ka jingshah tyllep ha ki nongwei.
Ka KSU ka kyntu ia ka sorkar ba ha ka jaka ban khohreh ia kata ka lynti kan bha shibun lada ka pynkhlain shuh shuh ia ka jingdawa ia ka ILP na ka sorkar pdeng bad ym tang ban shu kut ha ki tynghung kotkhubor. Ka KSU ruh ka maham tyngeh ba lada ka sorkar ka iaid shakhmat ia kane ka jingai jingbit bad lada ka NFR ka sdang ia kane ka kam, ka seng kam banse ban leh da kaba tyngeh ban pynsangeh ia katei ka jingthmu ba sniew bad ki dkhot ka seng ruh ki long kiba la kloi ban shong along biang, ban shah bom shah tied biang ha ki pulit bad wat ban aiti ruh ia la ka jingim.
Kyntang ia wai ban pynkut ia kane ka kyrwoh, ka KSU ka phah ia kane ka khubor sha ka sorkar “ynnai rhah pynpoi lynti rel palat mynta, hynrei trei minot thop miet bad sngi ban pynpoi ia ki khyrdop ILP ha jylla, lym kumta mad ia ki jingiakhih kiba tyrha” Kane ka long katkum ka kyrwoh bala phah da u samla Donal V Thabah general secretary ka seng kmie KSU.
