Shillong, Nailar 30: Ki nongialam bad ki dkhot ka seng Hynñiewtrep National Youth Front (HNYF) ka shnat 20 Mer kila leit ban jurip ia ka jingkieng kali ha Lailad, kaba pyniasoh ia ka surok na Umling bad 20 Mer sha Patharkhnah kaba katei ka jingkieng ka la long ka daw ioh ba kan dkut ne kdiah noh ha kano ma ka por.
Hadien ka jingjurip ki la leit pat ban ia kynduh ia u Bah M.Pyrbot Executive Engineer PWD Nongpoh Division bad haryngkat da kaba la buh ruh da ka dorkhas haba iadei ban shimkhia halor katei ka jingkieng.
Ki nongialam ka seng ba kynthup ia u Bah Shining Suting, President bad u Bah Paid Wahlang u dkhot ka district unit, ki la iathuh ba ki la pynlong ka jingjurip mynta hi ka sngi ka 30 tarik Nailar, 2023 bas hadien kata ki sa leit kynduh bad u EE ka PWD Division Nongpoh.
Ha ka jingiakren bad utei u ophisar u la ai jingmut ba kin leit kynduh bad ujor sha u Deputy Commissioner ka district, ban ioh leh ia kaba donkam, ha kaba ki la ong ruh ba shen kin sa leit kynduh bad u DC kumba la iatai sani bha ha ka jingkynduh bad u EE.
