Shillong, Nailur 31: Ka seng samla pule KSU mynta ka sngi kala buh ia ki khyrdop jong ka ha 20.Mer ha Ri Bhoi District bad ha Ratachera ha East Jiantia Hills District, bad ha Athiabari jong ka West Khasi Hills District. Ka jingbuh ia kine ki khyndop ka long ba ha dien ba la pynmih ia ka NRC na ka jylla Assam bun bah ki briew kiba khlem mih kyrteng kila sdang ban phet sha kiwei ki jylla jong ka dong shatei lam mih ngi jong ka Ri India.
U Presdient jong ka seng KSU seng kmie u Samla Lambokstarwell Marngar haba kren ha u SP News Agency u la iathuh ba ka seng kala buh lai tylli ki khynrdop ban peit ia ka jingwan rung ki briew na ka jylla Assam, kawei ha Ratachera ha East Jiantia Hills, ha 20-Mer ha Ri Bhoi District bad ha Athiabari ha West Khasi Hills District.
La iathuh ba tang mynta ka sngi ki dkhot jong ka seng kila pynphai palat 2000 ngut ki briew kiba la wan kiew na Assam, kiba bun eh ki dei ha Ratachera ha kaba kila pynphai palat ia ka 1000 ngut. Ha kane ka jaka kila ioh ban bat palat 30 tylli ki trok ba kit ia ki briew kiba wan na Assam na kithain Silchar.
Ha 20-Mer jong ka Ri Bhoi District ki dkhot jong ka seng kila ioh ban pynphai palat 500 ngut. Dei ha dien shiteng sngi ba kila wan ki bor jong ka District Administration ban ia kren bad kila poi sha ka jingiamenjur lang ba ha kane ka jingpeitnor ia ka jingwan rung ki briew na Assam kin ia don lang ki pulit bad ki dkhot jong ka seng ha 20 –Mer.
Haba ia dei bad ka khyrdop ha Ratacherra na ka liang jong u Deputy Commissioner jong ka East Jiantia Hills District yn khot ia ka jingialang la shai ka sngi ha ka jingiadon lang ki pulit ban ia kren kumno ban khanglad ia ka jingwan rung ki briew na Assam ha dien ba la pynmih ia ka NRC ha katei ka jaka.
Ha West Khasi Hills ka seng kala buh ia ka khyrdop ha Athiabari bad ha kane ka jaka ki dkhot jong ka seng kila ioh ban bat kumba 500 ngut ei ei ki briew kiba la kiew na Assam bad ka seng kan dang iaid beteng ban ap ha kane ka jaka namar kumba ka long mynta ki bor jong ka District Administration jong ka West Khasi Hills kim pat leh ei ei ha kaba ia dei bad kane ka kam.
U nongialam rangbah jong ka seng KSU u la ong ba na ka liang jong ka seng kam banse ban leh ia kane namar ka sorkar kam shym la leh ei ei ban pynkhreh ban peitngor ia ka jingwan rung ki briew na ka jylla Assam ha dien ba la pynmih ia ka Draft jong ka NRC ha jylla Assam.
Ha ka jingshisha kala don ka jingbethah na ka sorkar ban peitngor ia kane hynrei kam shym don kano kano ka dok ba kan don da ka kam ha madan dei na kane ka daw ba ka KSU kam banse ban shim ia kane ka kam ha la ka jong ka kti ban jurip ia ka jingwanrung ki briew na ka jylla Assam sha kane ka jylla Meghalaya.
