Shillong, Nohprah 04: U Myntri Rangbah ka jylla u Conrad K. Sangma mynta ka sngi ka 4 tarik u Nohprah 2024 u la plie ia u maw nongrim na ka bynta ka hotel 5 Star kaba lai jong ka jylla, ka Aurika Hotel by Lemon Tree Hotels Ltd.
Ia kane ka jingplie ia u Mawnongrim la pynlong ha ka Orchid Hotel ha Polo, Shillong ha ka jingdonlang u myntri ka tnad jngohkai pyrthei u bah Paul Lyngdoh, u Chairman ka Meghalaya Tourism Development Corporation (MTDC) u Bah Sanbor Shullai, U Chief Secretary u Bah D.P. Wahlang, u Commissioner & Secretary in-charge Tourism u Dr. Vijay Kumar D, COO ka Lemon Tree Hotels Ltd. Director of Tourism Cyril V.D. Diengdoh bad kiwei kiwei.
Ia kane ka hotel kaba heh bha, kaba la thmu ban don 130 tylli ki kamra, la pyntrei ha ka jinglut kaba T.124 klur hapoh ka rukom Public-Private Partnership (PPP). U CM u la pynpaw ïa ka jingdonkam jong kane ka projek, da kaba khot ïa ka kum ka Public-Private Partnership kaba heh tam ha Meghalaya, kaba la pynkhreh ban kyntiew ïa ka kam jngohkai pyrthei, ban kyntiew ïa ka roi ka par, bad ban thaw ïa ki lad kamai kiba kongsan na ka bynta ki samla.
Kum shi bynta ban pynkylla ia ka Orchid Hotel kaba la don lypa sha ka Aurika Hotel, ka Lemon Tree Hotels Ltd. Kan ai T.5 klur kum ka bai sdang, ka jingsiew kaba shisnem kaba long Rs. 2.05 klur sha ka MTDC, bad noh synniang 1% na ka jingmih baroh jong ka hotel.
U Chief Minister u la ai jingmut ba kane ka Hotel thymmai ka lah ban bat ia ka pateng jong ka da kaba shim ia ka kyrteng Aurika Orchid Hotel. Kane ka projek ka thmu ban kyntiew ïa ka kyrdan jong ka Meghalaya kum ka jaka jngohkai pyrthei kaba pawnam katba ka dang kyntiew ïa ka roi ka par kaba neh ha ka thaiñ.
