Shillong, Nailur 09: U Lamphrang ka iing dorbar thawain ka jylla u bah Metbah Lyngdoh u la ong ba la buh ia ka thong ban pyndep ia ka jingtei ia ka ing dorbar thaw ain ka jylla ha u bnai Nohprah 2021.
Haba kren ha ki lat pathai khubor mynta ka sngi ha dien ka jingialang ban bishar bniah ha kaba ia dei bad ka jingpyntrei ia ka iing dorbar thaw ain ka jylla la iathuh ba ka jingtrei haduh mynta la lah ban pyndep 50%. La buh ia ka thong ba ia ka dorbar mang tyngka jong u snem 2021-22 yn pynlong ha kane ka iing dorbar ba thymmai.
Ha kane ka jingialang mynta ka sngi la khot ia baroh ki tnad sorkar kiba ia don bynta ha kaba pyntrei ia kane ka iing dorbar thaw ain naduh u Chief Secretary ka jylla u M S Rao, na ka PWD, PHE, ka kompeni Design Associate, na ka MUDA ha kaba u myntri ba dei peit kam pynroi sor u Hamletson Dohlieng u la ia don lang.
Haba ia dei bad kane ka jingtrei na ka liang jong u myntri rangbah ka jylla u Conrad K Sangma u la dep ai ka jingkular ba ka pisa kam dei ka jingeh. Ka jingmang pisa na ka bynta kane ka iing dorbar ka long T.127.76/- klur ia mynta hynrei la buh kylluid ba yn lah ban pyndep ia ka hapoh ka T.141/- klur.
Kumba ka long ka jingeh kaba mih ha kaba sdang dei tang ha ka por ba tih ia ka nongrim jong ka iing ha kaba la hap ban pynngam shapoh haduh 25 meeter namar ka jaka ka long sharing, na ka liang jong u kontraktor u la shim khia bha ia kane ka kam bad ka jingtrei kala iaid beit.
Namar kane ka COVID-19 kala ktah ha kaba ia dei bad ka jingwan rah ia ki nongtrei kiba tbit na sha bar, la ong ba kum u Lamphrang ka iing dorbar u la shim khia ha kaba ia dei bad kane ban ia kren bad ka tnad Political department ban kham pynsted ia ka kam.
Haba ia dei bad ka jaka pynlong ia ka dorbar la shna ban lah ban shong 80 ngut ki MLA, wat la ka iing dorbar jong ka jylla ka don 60 ngut ki MLA ia mynta kane ka long ka jingpynkhreh lypa ia ki por ban sa wan.
Kane ka jingtei kaba mynta ka dei ka bynta kaba nyngkong bad ha dien kane kin sa bud kiwei kiwei ki jingtei na ka bynta ka jingdon kam ka iing dorbar thawain kum ka ophis ia ki nongtrei ka Hostel ia ki MLA, ki nongtrei bad ka jingpynkhreh ban ka jinglut baroh kan long T.500 klur kat ban da dep lut baroh.
