Shillong, Nailur 09: Ka Sorkar Jylla ka la buh thong ban pdiang palat 7 lak ngut ki khynnah pule ha Meghalaya hapoh ka skhim Pradhan Mantri Poshan Shakti Nirman (PM POSHAN) kaba ju tip mynshuwa kum ka skhim Mid- Day Meal.
Ka skhim Pradhan Mantri Poshan Shakti Nirman (PM POSHAN) ka dei kaba bei tyngka da ka Sorkar Pdeng kaba pynbiang bam ia ki khynnah Bal Vatika bad ki khynnah skul kiba don ha ki klas I-VIII ha ki skul sorkar bad ki skul ba ai jingiarap ka sorkar.
Kane ka skhim ka ai jingiarap ia kumba 12 klur ki khynnah kiba hapdeng 5 bad 11 snem ka rta kiba kynthup 22.6 lak ki khynnah na Bal Vatika, 7.2 klur ngut ki khynnah ha ki klas primary bad 4.6 klur ngut ki khynnah kiba don ha ki klas upper primary, kiba don ha 11.20 lak tylli ki skul ha kylleng ka ri.
U Director ka tnat School Education and Literacy, u Ambrose Ch Marak ha ka jingai jingkren shaphang ka jingpyntreikam ia ki prokram u la ong ba ka kam ka dang iaid bha shakhmat bad ym don kino kino ki jingujor haduh mynta. U la bynrap ba ka tnat ka dang pynthikna ba kane ka prokram ka ai jingmyntoi ia kito kiba dei ban ioh bynta.
Naduh une u snem, ka Sorkar ka la pdiang lang ia ki skul pre-primary hapoh ka prokram bad ka thong ka dei ban pyntreikam ia kane ka prokram ha kumba 11226 tylli ki skul kaba kynthup 7938 tylli ki skul lower primary bad 3288 tylli ki skul upper primary.
Kane ka skul ka dei tang ia ki skul sorkar bad ki skul kiba ioh jingiarap na ka sorkar.Ka thong pynrung kyrteng mynta u snem ka dei 710982 ngut ki khynnah pule ha une u snem bad haduh mynta kane ka prokram ka la poi sha 706515 ngut ki khynnah pule.
Ka bam ba ai hapoh kane ka prokram ka pher na ka distrik sha ka distrik bad ki ju ai ia ki jhur hapoh kane ka skhim.Ka Sorkar Pdeng bad ka bynta jong ka jylla ka la buh thong ban pynlut kumba T 113 klur 94 lak mynta u snem na ka bynta ka jingpyntreikam kaba jop ia kane ka prokram.
Ki thong jong ka PM POSHAN ki dei ban pynbeit ia artylli ki jingeh ba ki khynnah ha ka ri ki ju kham iakynduh kiba long ka jingthngan bad ka jingioh lad jingpule da kaba kyntiew ia ka jingioh ia ka bam kaba tei ia ki khynnah kiba don hapdeng ki klas Bal Vatika bad I – VIII ha ki skul sorkar bad ki skul ba ioh jingiarap na ka sorkar.
Ka jingpynshlur ia ki khynnah kiba wan na ki iing baduk basuk, kiba wan na ki bynta ka imlang sahlang kiba shem jingeh, khnang ba kin wan skul kham tista bad ban iarap ia ki ba kin pylleit jingmut ha ki jinghikai.
Ka jingpynbiang ka bam ba tei ia ki khynnah kiba don ha ki klas elementary ha ki jaka kiba iakynduh ia ka jingduna um ha ki por ioh shuti bad ha ki por ba jia ka jinglynshop ki bor mariang.
Hapoh ka PM POSHAN, la ai ia ka bam ba dang shu dep shet ia baroh ki khynnah kiba dei ban ioh bynta ha ki sngi ba long skul, ka bam kaba don 450 calorie bad 12 gms protein na ka bynta ki khynnah primary bad 700 calorie bad 20 gms protein na ka bynta ki khynnah upper primary.
Dang shen, la pynshlur ia ki jylla ba kin kyntiew ia ka jingiadon bynta ki Self Help Group (SHG) jong ki longkmie bad ki Farmer Producer Organization (FPO) ha ka jingpyntreikam ia ka skhim.
