Shillong, Lber 20: Ka Hynniewtrep National Youth Front (HNYF) Southern Border kala rai ban kyndang naphang ia ki skul sna iap kiba don ha khappud jong ka Mawsynram bad Ranikor C&RD Block.
Ia kane la pynpaw da u Bah Kyllang Shngain Thongni uba dei u President ka HNYF Southern Border ha kaba kren bad ki lad pathai khubor da kaba u la ong, Ngi tip bha halor ka jingdon jong ki skul sna-iap kiba don tang ka kyrteng hynrei ki bym shym la trei kam bad shu bam tang ia ka tulop.
U Bah Kyllang u la ong ba ha kane ka dong ka thain ha khappud ki don ki skul kiba ym trei kam bad halor kane ka seng kan sa kyndang naphang ia kum kine ki skul.
Ha kawei ka liang u Bah Kyllang u la ong, “Hapoh kane ka dong thain khappud ki don ruh ki nonghikai skul sorkar kiba ym ju leit sha ki skul da ki snem ki snem hynrei ki shu ai bylla sha kiwei ban hikai skul ha ka jaka jong ki bad ki shu bam jem beit ia ka tulop sorkar”.
Une u nongialam ka HNYF u la ong, Kane ka jingleh jong kine ki nonghikai skul kala ktah bha ia ki khynnah skul namar ba ki nonghikai kiba tbit kim treh ban wan sha skul hynrei ki shu ai bylla noh sha kiwei kiba ym shym pat la don ka jingtbit bad kiba ym pat ju ioh ne shah ai jinghikai.
Shuh shuh u la ong ba nonghikai kiba shu ai bylla ia ka kam jong ki sha kiwei pat kham bun kidei ha ki skul ba don ha khappud kiba don ha ki shnong ba shong basah ki Jaitbynriew, Garo, Hajong, Myndai bad kiwei kiwei de.
