New Delhi, Jylliew 09: U Myntri ka Jal Shakti, Gajendra Singh Shekhawat ha ka shithi sha u Myntri Rangbah ka Meghalaya u lah pynpaw ka jingsngewkhia halor ka jingsuki ka rukom pyntreikam ia ka Jal Jeevan Mission (JJM) ha ka Jylla. Ka Jylla ka thmu ban pynpoi um kor sha baroh ki longiing ha ki jaka nongkyndong shuwa u Nohprah, 2022.
Kumba lah pynbna da u Myntri Rangbah duh jong ka ri, u Narendra Modi ha ka jingai jingkren jong u ha ka sngi rakhe ia ka jinglaitluid, ki Jylla ki lah pyntreikam ia ka JJM kaba thew ban pynpoi um sha baroh ki longiing lyngba ki kor um (FHTCs) shuwa u snem 2024. Kane ka mission ka dei ka rukom ban pynthikna ia ka burom jong ki longkmie bad ki kynthei da kaba pynduna kam ia ki.
Da kaba ban jur halor ka jingdonkam ban pyrkhat bha halor ki kam ba dei ban leh ban pynurlong ia kane ka jingthmu hapoh ka por ba lah buh da kaba peit bha ia ki kam ban pynkhlain ia ki rukom sam um kiba lah don lypa khnang ban ioh pynpoi kor um sha ki long iing ba dang sah.
U Myntri u la kyntu ia ki Myntri Rangbah ba un ban jur halor ka jingdonkam ban sdang noh mardor ia ki kam hapoh ka ’campaign mode’ ha ki 3,891 ki shnong jong ka Jylla kiba lah don lypa ki rukom sam um lyngba ki pipe. Dei ban leh shuwa ha ki shnong kiba don ha ki aspirational distrik, ki shnong ba bun paid ki SC / ST bad ki longiing bad ki shnong kiba don hapoh ka Sansad Adarsh Gram Yojana.
U Shekhawat u lah ong ba hapoh ka Jal Jeevan Mission, ka Sorkar India ka ai ia ka pisa katkum ka jingbun ki jingring kor um ba hap pynbiang bad ka jingpyndonkam ia ka pisa ba don. Katba ka don ka thong ban pynpoi um kor sha ki 1.17 lak ki longiing ha u snem 2019-20, lah pyndep ha tang 1,800 tylli.
Shuh shuh, lah mang haduh T. 86.02 klur ha u snem 2019-20 na ka bynta ka Meghalaya, hynrei namar ka rukom trei kaba suki, lah pyllait tang T. 43.01 klur bad na kane, ka Jylla ka la lah ban pyndonkam tang T. 26.35 klur ha kaba lah sah sa T. 17.46 klur.
Da kaba iathuh ia u Myntri Rangbah ba ka jingmang ia ka Meghalaya mynta kala kiewsha ka T. 174.92 Crore ha u snem 2020-21, bad ryngkat bad ka T. 17.46 klur ka ba dang sah, ka Meghalaya ka lah thikna ba kan ioh T.192.38 klur. Lyngba ka bynta jong ka Jylla, ka Meghalaya kan don haduh T. 216 Crore ha u snem 2020-21 ban pyntreikam ia ka JJM.
U Shekhawat u lah ban jur ba ka jingpynpoi um sha man ki longiing ha ki jaka nongkyndong ka dei ka thong kaba kongsan jong ka ri bad ba ka Jylla ka hap ban leh ia kaba donkam ban pynurlong ia kane ha ka por kaba biang.
Da kaba kdew ia ka jingdonkam ia ki tyllong um a ka bynta ka jingtyngkai ia ki jaka um, u Myntri u lah ai jingmut ba dei ban pynkhlain ia ki rukom sam um kiba lah don lypa khnang ban pynneh ia ki rukom sam um dih.
Ia ka jingthmu dei ban pyrkhat ha ki shnong bad dei ban don ka Village Action Plan (VAP) ha man ka shnong kiba dei ban pynkhreh da kaba iatri lang lyngba ki prokram bapher bapher kum ka MGNREGS, SBM, ki grant ka 15th Finance Commission sha ki PRI, ki fund CAMPA, ka fund District Mineral Development, ki Local Area Development fund bad kiwei kiwei.
Lah ong ru ba ki bor shnong ne ki Gram Panchayat bad ki nongioh jingmyntoi ki dei ban iadon kti ha ka rukom pyrkhat, ka jingpyntreikam, ka jingpyniaid bad ka jingsumar ia ki rukom sam um kor ha ki shnong khnang ba lah ban urlong ia ki thong. Ha man ki shnong, dei ban sdang ia ka IEC campaign khnang ban pynlong ia kane ka Jal Jeevan Mission kum ka jingiakhih jong ki briew.
Ha u snem 2020-21, lah mang haduh ₹ 182 klur ia ka Meghalaya namar ki grant ka 15th Finance Commission sha ki PRIs bad shiteng jong kane ka dei ban pyndonkam na ka bynta ki kam pynpoi um bad ki kam pynkhuid. Ki fund hapoh ka Swachh Bharat Mission (G) ki dei ban pyndonkam ban pynkhuid ia ka um jaboh babad ha ki kam ban pyndonkam biang ia ka um.
Hadien ka khlam Covid-19, ka dei kaba donkam ba ki briew km ialum ha ki jaka ioh um. Lah kyntu ia u Myntri Rangbah ka Meghalaya ba un sdang noh ia ki kam pynpoi um kor kaban iarap ha ka jingpynjngai iwei na iwei bad kaban iarap ia ki briew ba kin ioh lad kamai ja kpoh ha ryngkat ka jingkyntiew ia ka ioh ka kot ha ki jaka nongkyndong.
U Myntri ka Jal Shakti u lah kular ia u Myntri Rangbah ka Meghaaya ba un ai ka jingiarap kaba donkam khnang ba ka Meghalaya kan long ka ‘100% FHTC State’ shuwa u Nohprah, 2022 bad u lah ong ruh ba u thmu ban iakren halor ka jingpyrkhat bad ka jingpyntrei ia ka JJM bad u Myntri Rangbah shen lyngba ka video conferencing.
