Shillong, Risaw 26: Ka KSU Education Cell EJHDU hapoh ka jingialam u Assistant Education Secretary Samla Benito Suja ha ka 25 tarik u Risaw 2024 ka la ioh ban ia kynduh ia u DC halor ka jing pynslem ban ai iaki syrnot jingdon jingem sha ki khynnah ba thep ban ioh bai bam hapoh ka district. Ki income certificate ki ba dei ban ioh tang da ki 1 2 sngi wat hadein 2 taiew ruh ym pat ioh.
Kum ban shu pynkynmaw ba iaka rukom thep scholarship mynshwa kaba donkam iaki khynnah ka long tang ban ioh iaki affidavit income na ki lawyer bad ka long kaba suk ban thep iaka scholarship hynrei dang ha une u snem bad ki bnai ba la leit ka sorkar lyngba ki district administration ka la pynmih hukum ba iaka syrnot jingdon jingem ban thep Scholarship yn hap ioh na DC ba la sign da mi magistrate .
Lad ban kdew hangne ba iakane ka hukum la pynmih ban pynsuk iaki khynnah hynrei ka long pynban ka jing pyn saja bad jing pynlynga iaki khynnah kiba kwah thep iaka scholarship namar ka jingpynslem ban generate iaka syrnot ka pyntieng iaki khynnah ioh duh ban aplai iaka scholarship.
Ka seng hadien bun ki jingujor ka la pynsgew iakane ka mat ha khmat u DC ba ka la dawa ban dei ban wad ki lad lynti kumno ban lait na kane khamtam da kaba ai jingmut ba dei ban pynbun ki nongtrei ha kum kine ki khep ba donkam ban trei iaka kam da 3 4 ngut ki briew.
Na ka liang u DC u la ong ba un sa bthah iaka shnat ba dei peit iakane ka kam ban pynduna noh ki kyndon ban apply khnang ban suk ban ioh kloi iaki syrnot jingdon jingem lane ki income certificate na bynta ban apply scholarship ki khynnah.
Ka seng ka la pynsgew ruh ba kumba la ju iohi halor ka rukom treikam ki wei ki jylla ba katkum ka Government Cadre Service ki don lai bynta ki nongtrei bad kata ki long working cadre ,ki Training cadre bad ki Leave cadre haba lada duna ki staff mut la lah ban pyndap na kine ki cadre ki ban trei iaka kam. Ka seng ka ai jingmut ba kum kane ka rukom treikam kadei ban don hapoh district bad hapoh jylla hi hapoh kawei.
Ka seng kan iaid buddien halor kane ka kam ha kine ki sngi bad ruh ban pyntikna ba ki khynnah kin nym don jingeh ban apply scholarship. Ha kane ka sngi na ka liang u DC ruh u la bynrap bad kyrpad ba lada ki khynnah kiba kyrkieh eh iaki income certificate ki lah ban kynduh markhmat bad u DC khnang ban iaid beit ka kam .
