Shillong, Risaw 12: U bah Starwin Kharjana president jong ka seng Khasi Disabilities Association (K.D.A.) u la ong ba mynta la shisnem hynniew bnai naduh ka 01 Iaiong 2017 haduh mynta kim pat ioh ia ka bai bam ba T.500/- tyngka kaba ki dei ban ioh man u bnai.
Ha ka kyrwoh kaba la phah da u Bah Starwin Kharjana mynta ka sngi u la ong ba ka seng kan ai por ia ka sorkar haduh ka 30/10/2018 mynta u bnai ba kan pynlait noh ia ka bai bam jong ki lem kumta kin pynlong da ka jingiakhih ban pynbor ia ka sorkar ba ka dei ban siew noh ia ka baibam jong ki.
Bah Starwin u la pynkynmaw ba ka seng kala dep ban ia kynduh ia u Myntri rangbah ka jylla ar sien bad ia u myntri ba deipeit ia ka tnad Social Welfare u Bah Kyrmen Shylla bad kine baroh ar ngut kila kular ban sa pynlait noh hynrei haduh mynta kim pat pynlait ia ka bai bam jong ki.
Kane ka jingbym pat siew jong ka sorkar mynta la shisnem hynniew bnai kala buh ia ki ha ka jingeh kaba khraw ka seng ka kyntu ia ka sorkar ban pynlait noh ia ka hok jong ki briew kiba don ka jingduna ha ki dkhot met ha ka jylla.
