Shillong, Jymmang 13; Mynta ka sngi ka Synjuk ki Waheh Shnong bad ki seng bhalang bapher bapher jong ka East Jiantia Hills kila ia mih paidbah ban pyrshah ia ka jingailad jong ka sorkar ban wanrah ia u dewiong na ka jylla Assam sha ki karkhana pynmih dewbilat kiba don ha katei ka District.
Ha kane ka jingiakhih da ki spah ngut ki briew kila ia mih paidbah na ki seng bapher bapher kiba don ha East Jiantia Hills District, ka JARF, JCDMA, EJCSA, MPLU, JSM, EJNC,HNYF,HANM,JSU, JYF, SBYWA. Ka jingiakhih ka jong ki ka long ba pynpaw ia ka jingpyrshah ba wanrah dewiong na Assam bad kaba la tip ba ka jingbun ki pang COVID-19 ha katei ka jylla kane ka bun jingma ia ka East Jiantia Hills baroh kawei.
Na ka liang jong u DC u bah FM Dopth bad u Superintendent ki pulit u V Singh ha dien ba kila ioh ia kane ka jingtip kila leit sha ka shnogn Ladlyiah ban ia kynduh ia kine ki briew kiba dang ha ka jingialum paidbah ban ia khih.
Ha ka jingiakren u Deputy Commissioner ka EJHD u la pan por 4 sngi na ki ne ki seng ban phah ka jingthoh sha ka sorkar bad ban khang noh ia ka jingthied ia u dewiong na ka jylla Assam.
Na ka liang ki Waheh shnong ka EJHD ki la rai ba la da ka sorkar ka dang sngap kuman ia ka ne ka jingdawa jong ki na ka liang ki waheh shnong kin ym treh shuh ban ia trei lang bad ki bor ka District Administration, ha ka ba iadei bad ka jingpeit ia ki ba wan na bar jylla haba ki dang leh quarantine ha ing.
Kumjuh na ka liang ki sengbhalang bapher bapher jong ka EJHD ki la iathuh ba lada ka sorkar kam treh ban sngap ia ka ne ka jingdawa jong ki, hadien ka 4 sngi naka liang jongki kin ym bah khlieh lada don kano kano ka jingjia ba sngewsih ha kane ka thain.
Ka jingmih ban pyrshah ki ne ki seng ka pynpaw shai ba ki ne ki seng ki khlem kheiñ shuh ia ka jing pynjari jong ka sorkar ia ka section 144 CrPC bad ka jingbthah ban ym ia lum paidbah ha ka juh ka jaka.
