Shillong, Naiwieng 04: Ki paidbah ka dong Ri Bhoi sepngi katba nangiai ki sngi ki hap ban mad bun jingeh ha ka leit ka wan ka kit ka bah na ka jingsniew ka surok Umling-Patharkhmah, Mairang-Rani Godown ka jingduh light khah khah bad kiwei.
Haba kren bad u Nongthoh khubor u President ka Western Ri Bhoi Dorbar u bah Najim Kharmalki uba long ruh u Rangbah shnong ka Patharkhmah u la ther ia u Myntri Rangbah Conrad Sangma, u Symbud Myntri Rangbah bah Preston Tynsong bad u bah S Sohtun MLA ka thain kiba la kular ban sdang ka jingtrei ban pynheh ia ka surok Umling-Patharkhmah ha u bnai Kyllalyngkot mynta u snem.
kaba sngewsih ki sdang trei shiteng u Nailar, kata hadien 6 bnai bad tih kyndew pathar ha ka por slap ban pynjynjar ia ki paidbah nongleit nongwan bad bun ki kali rit ki sah kut ha lynti na ka jingktieh ka surok bad ki paidbah ki jynjar ban kit ia ki nongpang ban pynpoi sha ki jaka sumar ha Nongpoh.
U la bynrap ka surok Umling-Patharkhmah ka dei u thied snam ban kyntiew ia ka dong Ri Bhoi sepngi, bad dei tang kane ka surok ba ki paidbah ka thain Bhoi sepngi ki leit ki wan ban pyndep ki kam ophis, skul bad ka khaii pateng, ka jingpyntrei ha ka por slap ka pynduh pynjakhom ia ki paidbah.
U Bah Najim ula kyntu ia u Myntri ka tnad PWD bah Prestone Tynsong, u MLA ka thain bad ki bor ba dei peit ban pynbha noh mardor bad ula byrgem ban khang noh ia katei ka surok lada kim pynbha kloi, namar kam long shuh ban iaid ki kali rit. Ki kali rit ki kiar ban iaid na katei ka surok namar ka la sniew lait noh kiba donkam eh.
U la iathuh ha ka 21 tarik Risaw ki paidbah ki sahkut kali da ki ar lai kynta hajan shnong Umtasen na ka jingkylla ka trok kitdieng, kane ka jia namar ka jingsiew ka surok kumta kam long sngain shuh ia ki paidbah ban leit ban wan namar ki lah ban sahkut ha shiteng lynti.
U ther ia u MLA ka thain u bah S Sohtun ba u leh bun kam ban leit plie mawnongrim ha kiwei ki konstwensi katba ha iing lajong u pynkyrsum ia ki paidbah.
