Shillong, Jylliew 18: Ka Voice of the People Party Jaintia Hills hapoh ka jingialam I bah Damewanhi L Rymbai u ba dei u Organizing secretary mynta ka sngi ka 18 tarik u Jylliew 2024 ki la leit ban ai da ka jingthoh ha khmat u CEM ka JHADC u Ma Thombor Shiwat na ka bynta ban dawa ia ka jingsiew dep ia ka tulop jong ki nongtrei jong ka JHADC ia ka ba la pynsah mynta la kumba 13 bnai.
Ha ba ioh ban ia kren bad u Bah Damewanhi Rymbai u la ong ba ki don ki nongtrei jong ka JHADC ki ba la poi ha duh u pud ba kin duh noh ia ka jingim ka jongki na ka daw ba kim donlad shuh ban pynbit pynbiang ia ki jingdon kam jong ki khamtam ha ka liang ka koit ka khiah.
U la ongruh ba ha kane ka jingiakren jongki bad u CEM ki la pynpaw ba kimkwah ba ka Council kan siew ia ka Tulop jong ki nongtrei jongki tang shibnai ne ar bnai ki ban long tang kum ka jingbynbiej hynrei ki dawa bad banjur ba ka Council ka dei ban siew dep ia baroh ka tulop ka ba dang sah jong ki.
Ka VPP ha ba ka tip ia kane ka la long ka ba la kloi ban ban ia rap ban iakren bad u CEM ka JHADC bad buhruh ha u ia ka jingkyrpad ba ki dei ban siew noh pyndep ia ka tulop jongki hapoh une u bnai kata kan long hashwa ba kin ioh ban lehkmen Behdeinkhlam. U la ongruh ba lada kane ka jingdawa jong ka party kam urlong na ka liang ka VPP kan sa leh ia ka ba don kam.
