Shillong, Naiwieng 19: U bah Titosstarwell Chyne Executive Member jong ka KHADC mynta ka sngi u la wanrah ia ka rai na ka liang jong ka Executive Committee ban pyrshah ia ka Citizenship Amendment Bill, 2016 kaba ka sorkar pdeng ka kwah ban pyntrei kam hapoh ka Ri India.
Kane ka Rai jong ka Executive Committee kaba la wanrah hapoh ka iing dorbar ka ong ban kyntu ia ka sorkar pdeng ba ia ka ain CAB ym dei ban pyntrei kam ha ka jylla Meghalaya bad kyrpang ha ki jaka kiba hap hapoh ka jingpeit jong ka District Council.
Haba kren hapoh ka iing dorbar haba wanrah ia katei ka rai, na ka liang jong u EM ba dei peit ia ka khyndew ka shyiap u Bah Titosstarwell Chyne u la ong ba lyngba kane ka rai jong ka iing dorbar kin phah sha ka sorkar pdeng ban pynpaw ia ka jingpyrshah ia ka CAB, 2016 kaba kane ka sorkar BJP ka thmu ban pynlong ain mynta.
U bah Chyne u la ong ba aiu kan jia lada kane ka ain CAB kan trei kam, ym tang ba kan ktah ia ka khaii pateng, kan ktah ruh ia ki jingsiew kiba laiphew jait. La kyrpang ia ka liang pyrshah ba kin ai ka jingkyrshah ia kane ka rai jong ka Executive Committee. La ong ba ki seng bhalang kila ieng ban iakhih ban pyrshah ia kane ka ain CAB.
Haba ia shim bynta ha kane ka jingiakren, na ka liang jong u bah R V Lyngdoh MDC na Mylliem, u la ong ba lada kane ka ain CAB jong ka BJP kan trei kam kan long ka jingma ia ka jaidbynriew rit paid, la ong ba ka jingdon jong ki hapoh District Council ka long ban iada ia ki rit paid.
U la ong ba ka UDP ka dei ka kynhun jong ka NEDA kala dei ban ong ia u Himanta Biswa Sharman nongialam ka BJP ba kin pyrshah ia ka CAB bad lada u pyrshah ia ka CAB, u Bah R V Lyngdoh u la ong ba u ruh un rung noh sha ka NEDA. La ong ba ka jylla Meghalaya ka dei shibynta jong ka Ri India kum no lah ban pynlait ia ka.
Ha ka jingkren jong u bah Paul Lyngdoh u la pynkynmaw ba kum ka jaidbynriew khasi la pynrung sha ka Ri India da kaba ia soi ia ka IOA bad ka AA bad dei u syiem jong ka hima nongstoin u bala soi khatduh ha u snem 1948, lada ka sorkar pdeng kam burom ia ki soskular ba la ia teh, hapoh ban ia kren biang halor kine ki jingiatehkular.
La ong ba kan myntoi iau katta ka lama UDP, lama Congress bad kiwei kiwei lada kane ka CAB kan treikam, u la ong ba lada ka sorkar pdeng kaleh don bor, lada don kam ban pynkylla ka phang pdeng jong ka jingiakren ha ka pyrthei ia kane ka kam hap ban leh.
Kiwei ki para MDC kiba la ia shim bynta ban ia kren ki long u Chief Executive Member u Bah Teinwell Dkhar, u Bah MN Mukhim, Bah Lambor Malangniang, bah Bindo M Lanong ha kaba u la ong ba ka ki seng reiwlum na North East ki Pyrshah ia ka CAB bad ia kane kila ia kren ha ka jingialang jong ka NEDA mynta u snem ha Guwahati.
Kiwei kiwei kiba la ia shim bynta ki long u nongialam ka liang pyrshah u bah Lamphrang Blah, Bah Batskhem Ryntathiang, Bah Karnes Sohshong, Bah Charles Marngar, Bah Gabriel Wahlang, Kong Grace Mary Kharpuri. Ha dien ka jingiakren ka iing dorbar kala pdiang ia kane ka rai ban phah sha ka sorkar pdeng ban pynpaw ia ka jingpyrshah ia ka CAB kaba ka sorkar pdeng ka thmu ban pynlong ain.
