Shillong, Naiwieng 23: Mynta ka sngi da ki phew hajar ki paidbah kiba dang don ha ka niam tynrai na kylleng ki lum Khasi bad Jaintia kila wan ban ia shim bynta ha ka jingrakhe ia ka Seng Kut Snem kaba 125 ha madan Weiking Shillong.
Ia ka jingpynher ia ka Lama seng la pyndep ha iing seng Khasi seng kmie ha Mawkhar bad ha dien la pynlong ia ka jingialum paidbah ha Madan Iewrynhep bad la pynlong ia ka jingduwai phirat bad la iaid paidbah na katei ka jaka sha madan Weiking bad ha kane ka jaka ruh la pynlong ia ka jingduwa phirat na ki longsan mansan.
Ha kane ka jingiaid lynti la pynphuh pynphing da ka riam shad khasi tynrai da ki rangbah ha ryngkat ki sympiah ki thuia ban pynisha ka pyrthei iala ka jong ka tynrai kum ki khun khasi khara kiba dang bat ia ka tynrai.
Kane ka sngi ka dei ka jingkynmaw burom ia ki 11 ngut ki riew rangbah kila suit la shor ia kane ka seng bad ka jingthmu ka long ban pynneh pynsah iala ka jong ka tynrai ban lait na ka jingshah pynduh iala ki jong ki riti dustur na ki nongwei.
Ha kane ka sngi kila don ruh ki jingpyninam ia ki tynrai la jong na ki shnat ka seng khasi bapher bapher bad ki Niamtre katkum ka dutur jong ki ia kiba la shna kyrpang ban pyniia ka jinglong tynrai sha ki paidbah.
Ha madan Weiking, la sdang da ka duwai phirat, bud sa ka seng ka khraw na ki longsan man san bad ka jingpyninam ia ki shad tynrai, ha kane ka sngi la pynkut ruh ia ka jingrakhe da ka duwai ka phirat ban pan ka jingkyrkhu na u nongbuh nongthaw.
