New Delhi, Iaiong 27: U Myntri Rangbah duh ka ri, Narendra Modi mynta ka sngi u la iakren bad ki Myntri Rangbah jong ki jylla lyngba ka video conferencing ban iakren halor ka jinglong jingman kaba don mynta bad ban pyrkhat halor ka jingialeh pyrshah ia ka jingpang COVID-19.
Kane kalong ka sien iakren kaba saw jong u Myntri Rangbah duh ka ri bad ki Myntri Rangbah jong ki jylla, ki jingiakren kiba ladep ki la long ha ka 20 tarik Lber, 2 tarik Iaiong bad 11 tarik Iaiong, 2020.
U Myntri Rangbah duh ka ri u la kdew ba ka pakhang shnong ka la long kaba jop ha kaba ka ri ka la lah ban pyllait im da ki hajar ki briew ha kine ki shi bnai shiteng ba la leit. U la bynrap ba haba ianujor bad kiwei kiwei ki ri, ka jingbun briew ha India kalong kumjuh bad ka jingshim kyllum lang ia ar lai tylli kiwei kiwei ki ri.
Ka jinglong jingman ha kiba bun ki ri, ba kynthup ha India, ka la jan iasyriem ha kaba sdang jong u bnai Lber. Hynrei, namar ka jingkloi ban shim ia ki lad jingiada ha ka por, ka India ka la lah ban iada ia kiba bun ki briew. U la ai jingmaham ba ka jingma jong une u khniang jingpang kam pat kut bad ka jingpeit bniah kaba man ka por ka long kaba donkam bha.
U Myntri Rangbah duh ka ri u la ong ba ka ri ka la don artylli ki pakhang shnong haduh mynta, baroh artylli kilong kiba iapher ha ki katto katne ki bynta, bad mynta ki hap ban pyrkhat ia ka lynti kaba shakhmat.
U la ong ba katkum ka jingong ki riewshemphang, ka jingktah na ka Coronavirus kan dang iai paw ha ki bnai ban wan. Da kaba ban biang ia ka mantra jong ka ‘do gaz doori’, u la ong ba ki mask bad ki jingda khmat kin long shi bynta ka jingim jong ha ki sngi ban wan.
U la bynrap ba hapoh ki jinglong jingman, ka thong jong baroh kalong ban leh mardor ia kaba donkam. U la kdew ba bun ki briew ki pynbna ia lade lada ki don ka jingjyrhoh bad biong khlieh lane ki dak jong ka jingpang, bad kane kalong ka dak ba ki pdiang.
U Myntri Rangbah duh u la ong ba dei ban phaikhmat kyrpang sha ka ioh ka kot bad kumjuh ruh ban bteng ia ka jingialeh pyrshah ia ka jingpang COVID -19. U la ban halor ka jingdonkam ban pyndonkam katba lah ia ka teknoloji bad kumjuh ruh ban pyndonkam ia ka por ban pdiang ia ki lad jingkylla.
U la ban ruh halor ka jinglong kongsan ban pynthikna ba bun ki briew kin download ia ka app Aarogya Setu ban pynkhlain ia ki jingpyrshang jong ka ri ha ka jingialeh pyrshah ia ka jingpang COVID-19. U la ong, “Ngi hap ban long kiba shlur bad ban wanrah ki jingkylla kiba ktah ia ka jingim jong ki nongshong shnong.”
U la ai jingmut ruh halor ban wanrah ia ki lad ban ialeh pyrshah ia kane ka jingpang bad ban pynkhlain ka jingwad bniah kumjuh ruh ban wanrah ia ki buit ba thymmai.
U la kdew ba ka jinglong kongsan ia ki jylla kalong ban pyntreikam pyrkhing ia ki jingbthah ha ki jaka ba don kane ka jingpang lane hotspot kata ki red zone area. U la ong ba ki jingpyrshang jong ki jylla kidei ban long ban pynkylla ia ki red zone sha ka orange bad hadien sha ki green zone.
Ha kaba iadei bad ka jingwanphai ki briew jong ka ri kiba don shabar, u la ong ba ia kane yn hap ban leh da kaba kynmaw ba kan nym buh ia ki ha ka jingeh bad kumjuh ruh kiba haiing hasem jong ki, kin nym don ha ka jingma ban ioh ia kane ka jingpang.
U Myntri Rangbah duh ka ri u la kyntu ruh ia ki Myntri Rangbah jong ki jylla ba kin khmih bniah ha kaba iadei bad ka jingkylla ka suin bneng namar ka jingsdang jong ka aiom shit bad ka por slap- bad ki jingpang ba lah ban wan ha kane ka aiom.
U Myntri ba dei khmih ia ki Kam pohiing jong ka Sorkar pdeng u la pynthikna ia ka jingdonkam ban pyntreikam ia ka pakhang shnong khnang ban lah ban iada ia ki jingim briew.
Ki Myntri Rangbah jong ki jylla ki la ai ka jingiaroh ia ka jingialam jong u Myntri Rangbah duh ka ri ha kane ka por jong ka jingeh, bad ki la pynpaw ruh ia ki jingpyrshang ba ki la shim ha ka jingtehlakam ia une u khniang jingpang.
Ki la kren shaphang ka jingdonkam ban long kiba peitngor ha ki thain khappud bad kiwei ki ri, bad kumjuh halor ka jingialeh ban weng ia ki jingeh ba iadei bad ka ioh ka kot bad ki lad ki lynti ban kyntiew shuh shuh ia ki jingdonkam ba iadei bad ka koit ka khiah.
ki nongialam ki la pynpaw ka jingsngewnguh jong ki ia ki pulit bad ki briew kiba trei ha ki kam ai jingsumar halor ka kam ba bha ba ki la leh ha ka jingialeh pyrshah ia ka jingpang COVID-19.
