New Delhi, Nailur 06: Ka Tnad Kam Jngoh Kai jong ka Sorkar India ka la wanrah ia ka IP (Intellectual Property) kaba nyngkong ha baroh kawei ka ri, ‘DekhoApnaDesh, People’s Choice 2024’ ban sngewthuh ia ki jingsngew jong ki ‘Bharat ki Janta’.
Ia kane ka sienjam la sdang da u Myntri Rangbah Duh, Narendra Modi ha ka 7 tarik u Lber, 2024 ha Srinagar. Ka jingthep vote kaniaid haduh ka 15 tarik u Nailur, 2024.
Ka jingthmu jong kane ka poll kaba long ha baroh kawei ka ri ka dei ban iatrei lang bad ki briew ban sngewthuh ia ki jaka jngohkai ba khring tam ia ki briew bad ruh ban ioh ia ki jingsngew jong ki nongjngohkai ha ki san tylli ki jait kam jngohkai, kiba iadei bad ka Jingngeit, ka deiriti bad ka hiar pateng, ka Mei Mariang bad ki MradKhlaw, Ki Adventure bad Kiwei Kiwei.
Ha ryngkat ki saw tylli ki phang, ka phang ‘Kiwei Kiwei’ ka dei ha kaba ki briew ki lah ban vote ia kiba ki sngewtynnad tam bad iarap ban pyni ia ki jaka jngohkai bym pat paw kum ki Shnong Vibrant Border, Ki Kam Jngoh Kai na ka bynta ka Koit ka Khiah, Ki Kam jngohkai na ka bynta ki kam kyntiewkurim bad kiwei kiwei.
Ka don ka rynsan ba kyrpang https://innovateindia.mygov.in/dekho-apna-desh/, ha kaba ki briew ki lah ban vote lyngba ki mobile number ne Email Id, ha ki thup bapher bapher (Ka Jingngeit, Ka Deiriti bad ka Hiar Pateng, Ka Mei Mariang bad ki MradKhlaw, Adventure bad Kiwei Kiwei).
Ki resol ki iarap ban iathuhia ki jaka jngohkai ba biang tam ha India ki ban ioh ia ka jingkyrshan bad ka jingbei tyngka na kito kiba don bynta ha kine ki kam.
Lyngba kane ka sienjam, ka Tnad ka thmu ban kyntiew bad pynnehia ki jaka kyrpang bad ki rukom im kiba iadei bad ka deiriti na ka bynta ki pateng ban wan. Kane kan plie lad ruh ia ka Tnad ba kan sngewthuh ia ki jaka jngohkai bym pat da paw ba ki briew ki kwah ban leit peit ha ryngkat kito ki jaka jngohkai kiba la kham paw.
Lyngba ka jingsdangia kane ka sienjam, ka Tnad Kam Jngoh Kai ka dang kyrshan ia ka jingiaid lynti ka India sha ka Viksit Bharat@2047, da kaba ithuh ia ki jaka jngohkai kiba jop bad kyntiew ia ki ha ka rukom treikam mission mode lyngba ka jingtrei jong ‘Baroh Kawei Ka Sorkar’.
