Shillong, Lber 05: U myntri ka koit ka khiah jong ka jylla u bah AL Hek u la ong ba ka jylla Meghalaya ka don hapdeng ka jingduna ki doktor kumba 50% ei ei haduh mynta bad ban pyndap ia kane ka jingduna kan dang shipor bun bun snem.
Haba kren ha ki lad pathai khubor mynta ka sngi ha ophis trei kam jong ka BJP, u myntri u la ong ba na ka liang jong ka sorkar mynta kan hap ban pynkiew ia ka “Bond ba leit pule doktor” khang ban khanglad ia ki samla pule ba yn da ki la dep dei ban wan trei shuwa san snem hapoh ka jylla.
Haba jubab ia ki jingkylli u myntri ka koit ka khiah u la ong ba ka dei ka jingshisha ba bun na ki doktor kiba leit ban pule na ka bhah jong ka sorkar, ynda kila dep ia ka jingpule, ki don kiba siew noh ia ka “Bond” namar ba kan don kano kano ka jingeh yn lah ban khang ia ki bad kane ka buh ia ka sorkar ha ka jingeh kaba khraw.
La iathuh ba na ka liang jong ka sorkar mynta kan wad ki lad ki lynti kumno ban tehlakam ia kane khang ba ki doktor kiba leit ban pule na ka bhah jong ka sorkar jylla ynda kila dep ki dei ban wan trei shuwa bad ka sorkar jylla bad ynda kila dep ia ka jingiakut kin sa la ban mih. Ka dor jong ka Bond mynta ka long tang T.25 Lak tyngka.
Haba ia dei bad ka jingpynkynriah kam ia ki doktor na ka liang jong u myntri u la ong ba ka sorkar ka leh ia kane katkum ka jingdon kam ym ba ka leh khlem da pynshong nongrim, la da kita ki doktor ki kwah ban resign noh yn leh kumno hynrei ka sorkar ka pynkynriah ia ki kat kum ka jingdon kam.
Na ka liang jong u mytnri u la ong ba bun na ki doktor ki kim kwah ban leit sha ki nongkyndong, kane ka jingeh kaba la buh ia ka sorkar bad lada ong pat ba ki dei ban leit ki reign noh na ka kam dei na kane ka daw ba ka sorkar ka dang wad lad mynta ban khang ia kane jingmih noh ki doktor.
