Shillong, Risaw 24: Mynta ka sngi u President ka seng A’chik Holistic Awakening Movement (AHAM) u Georgeprince Ch. Momin la phah ia ka dorkhas sha u myntri rangbah duh jong ka Ri India u Narendra Modi ban dawa ba ia ka ktien Garo dei ban pynrung ha ka khyrngit kaba phra jong ka Riti Synsahar ka Ri India.
Ha kane ka shithi kaba la phah sha u Myntri Rangbah duh jong ka Ri India ka AHAM kala pynpaw ba kane ka jingdawa ban pynrung ia ka ktien Garo ha ka khyrngit kaba phra jong ka riti synshar jong ka Ri India kala iaid mynta la 30 snem bad kane ka jingdwa jong ki ka long kaba shongnia.
Ka seng AHAM kala dew ba ha kine ki khyndait snem kiba la ioh ba kala pynlong ia bun tylli ki ktien hapoh ka khyrngit kaba phra ka riti synshar jong ka ri India da kaba thaw ia ki committee kum ka Pahwa Committee ha u snem 1996 bad ia ka Sitakant Mohapatra Kommittee ha u snem 2003 bad kine ki committee kila ai jingmut sha ka sorkar pdeng ban pynrung ia ki ktien ha ka khyrngit kaba phra ka Riti synshar ka Ri India.
Ka AHAM kala ong ban kren ia ka ktien la jong ka dei ka hok jong kano kano ka jaidbynriew bad ia kane la ithuh da ka UNESCO, kumba ka long mynta ka ktien Garo kala dang kiew ha kaba bun ki kot kila mih bad ka dei ka ktien kaba la hikai ha ki skul bad ia kane ka ktien ka kren ha Meghalaya, Assam, Arunachal Pradesh, Tripura, Nagaland bad katto katne ha West Bengal.
Ha Ri India kiba kren ia ka ktien Garo ki don palat ia ka 1 million, ha Bangladesh kiba kren ia ka ktien Garo ki don 0.2 million, hynrei ha ka jingwat bniah kaba dang shem la shem ba palat ia ka 3.4 million kiba kren ia ka ktien Garo. La ong ba ka sorkar ka dei ban sngewthuh ba ia ka ktien garo la kren ha ki 12 tylli ki rukom kren ki ktien.
Ka AHAM kala kdew ba ki nongmih khmat sha ki iing dorbar thawain ki jylla ha Meghalaya 24 ngut na Garo Hills, na East Khasi Hills 2 ngut, u wei ha Assam kum ki MLA, 1 MP ha India bad 1 ha Bangladesh, ia mynta bun na ki jingpyntip ka sorkar ha Garo Hills la thoh da ka ktien phareng ba ki briew kim sngewthuh.
Ha ka Ri India na ki 28 tylli ki jylla, 15 tylli ki jylla kila ioh ban ithuh ia ka ktien jong ki ha ka khyrngit kaba phra jong ka Riti Synshar ka Ri India, na ki 7 tylli ki Union Territory, 6 tylli na ki kila ioh ia ka jingithuh ia ka ktien jong ki hapoh ka riti synshar ka ri India. Ka ktien garo ruh ka don kam ban rung namar ka don la ka jong ka riti dustur.
