Jowai, Ïaiong, 17: Hadien ka jingioh jingtip jong ka AJYWO Central Body lyngba ka RTI halor ka jingdon jong ki Trading License, ba ki don tang 1397 ki Trading License ha Ri Jaiñtia, kiba kynthup ia ki jaid khaïi-pateng bapher bapher, ka seng ka la dawa jur n aka JHADC b aka dei ban khang noh tdam ia ki dukan barjylla ki bym don Trading License khnang ba ailad ia ki briew jong ngi ban sdang seng hi noh la ki jong ki jong ki lad kamai ka jih.
“Ka jingbym shym la lah jong ka JHADC ban pyntrei kam pura ia ka ka aiñ “The Jaintia Hills Autonomous District (Trading by Non-Tribals ) Regulation (Act)-2011, ka pynlong ia kiba nabar jylla ban wan kiew kum ki ngap sha Ri Lum Ri Jaiñtia, namar ka lad kamai kajih hane ka suk bha bad ym donkam ban iaid kat kum ki kyndon aiñ” ong u Bah M H Dkhar, President jong ka AJYWO Central Body.
Kum ban shu pynkynmaw, ha ka 26 tarik, u November, 2018, ka AJYWO, hadien ba ka la lap lyngba ka RTI ba ka ba ka jingpyntrei kam ia ka Trading License ha Ri Jaiñtia, kam shym la iaid beit iaid ryntih, ka seng ka la leit ia kynduh ia u CEM jong ka JHADC ha ryngkat ka dorkhast bad dawa jur na u, ban pyntrei kam pura ia Trading License bad Non-Tribal Employees’ Service License ha ka Ri Jaiñtia, bad ruh dawa na u ba ym dei ban ai pathar ia ki Trading License khnang ban ailad ia ki briew jong ngi ban sdang hi noh ia la ki lad kamai kajih kiba ki lah ban leh.
Hadien khyndiat bnai ka jingiakynduh jong ka AJYWO ia u CEM barim ka JHADC, ka seng ka la wad jingtip biang lyngba ka RTI bad kaba lyngoh ka long ba kat ka Ri Jaintia, don tang 1397 tylli ki Trading License ha ka haduh mynta. “Kat shaba ngi phai la jan ha baroh kawei ka Ri Jaiñtia, ki don tang ki dukan bar jylla suda bad ka jingkylli ka long, kat kine ki dukan ba la pyniaid da ki barjylla suda, balei kim don Trading License bad lada kim don Trading License, kata, ki pynkheiñ ia ka aiñ bad balei ka JHADC kam pynshitom lane khang noh ia ki?” bynrap biang u Bah M H Dkhar.
Na ka bynta ka jingtip jong ki khun ka Ri Jaiñtia, ka jingdon jongki Trading License ha Ri Jaiñtia haduh ba ioh ia kane ka RTI ba mynta u snem ka long: Ladrymbai, 508; Khliehriat, 387; Jowai, 257; Howkers, 42; Coal/Cement 48; Umkiang, 33; Dkhiah, 38; Mynkre, 20; Sookilo, 17; Thangskai, 12; Nongsning, 8; Jalaphet, 5; Moopala, 4, Byndihati, 2; Chiehruphi, 6; tongseng, 10. Ka Total=1397 tylli. Hato kane ka jingdon ki Trading License ka long kaba lah ne em ban pdiang da u khun u hajar jong ka Ri Jaiñti haba kat shaba ngi peit ki jaka ba long iew, don tang ki dukan barjylla suda?
U Bah M H Dkhar u la ong shuh shuh, “Ka JHADC ka tlot palat, ki Executive Committee ba pher ba pher kim shym la leh da kaba tyngeh halor ka Trading License namar kata ka daw, ki nongwei ki ioh ban wan kiew suk bad leh busisness kat ba ki mon sha Ri Lum Jaiñtia.
Ka jingbym lah jong ka JHADC ban tehlakam ia ka khaïi-pateng jong ki barjylla hapoh u pud u sam jong ka Ri Jaiñtia, ka wanrah ia ka jingduh nong kaba khraw bha ia ka JHADC ha ka liang ka pisa tyngka bad ruh kane ka jingtlot palat jong ka JHADC ka buh ia ka ri bad ka jaidbynriew ha ka jingma kaba khraw, bad lada ka JHADC kam kyndit bynriew, ka por kan ym slem shuh ba ngin sa kylla long kum ka jylla Tripura”.
Ka AJYWO ka dawa jur na ka JHADC ba kam dei ba shong kli kti shuh kum ha ki phew phew snem ba la dep hynrei ka dei bad sdang noh ban trei la ka kam mynta da kaba pyntrei kam pura ia ka Trading License bad ka NESL bad ruh ka seng, ka kyntu jur ia ki 30 ngut ki MDC jong ka JHADC ba ki dei ban pyrkhat bad shim khia bha ia kane ka kam kaba ktah ia ka iap ka im bad ka lawei jong ka Jaidbynriew.
Dang don shibun kiei kiei ki ba dang dei ban tih bniah bha halor ka jingpyntrei kam ia ka Trading License bad ka Non-Tribal Employees’ Service License ha Ri Jaintia. Ka Seng kan ym shong kli kti hynrei kan dang iaid bud dien ia kine baroh ar bad la da jia ba ka JHADC kam lah ban leh ei ei halor kane, ka seng kan sa hap ban leh da kaba tyngeh ha ka jingiadei bad ka Trading License bad ka NESL, pynkut u kyrwoh.
