Shillong, Jylliew 18: Ka Confederation of Ri Bhoi People (CoRP) ka dawa ia ka sorkar jylla lyngba ka tnat pule ban plie noh ia ka iing skul thymmai jong ka Nongrim Jirang Lower Primary School kaba la dep shna naduh snem ba la dep hynrei haduh mynta ym pat lah ban plie ia katei ka iing skul thymmai.
Ka seng CoRP ka pynpaw ka jingsngewkhia ia ka jingpynslem ka sorkar ban plie ia ka katei ka iingskul ba shna kyrpang na bynta ka jingbit jingbiang ki khynnah skul.
Ha ka jingshisha ka la dei ban plie ia katei ka iing skul shwa ban long skul mynta u snem kaba lyngngoh haduh mynta ym pat lah ban plie ha kaba ki khynnah skul bad ki nonghikai ban kynduh jingeh namar ki hap ban pynlong skul ha ka iing skul barim kaba la jot bad ki khynnah ki shem shitom ha ka por slap.
Kumta na ka liang ka CoRP, ka dawa na ka sorkar ka dei ban plie noh ia katei ka iing skul thymmai na bynta ka jingmyntoi ki khynnah skul, namar lada kan shu ieh katei ka iing skul kan jot bad pra bad kylla iingjah.
Halor kane u Rangbah shnong ka Nongrim Jirang Bah K Rani ula iathuh, ba ki dkhot ka komiti jong ka shnong bad ka Managing Committee ki la pynbeit ia ka sngi ban plie ia katei ka iing skul thymmai, hynrei ka la pulom noh namar ba u MLA ka thain u bah S Sohtun u khlem wan satia ha katei ka sngi ula ong.
Kane ka jingleh u nongmihkhmat ka pynpaw ba um burom ia ka shnong bad ka jingdohnong namar ka shnong ka la pynkhreh ia ki jingdonkam ha katei ka sngi. Kane ka long katkum ka kyrwoh khubor ba la phah da Bah Gershome Hat, Vice President ka CoRP.
