Shillong, Rymphang 13: Ka seng Confederation of Ri Bhoi People (CoRP) seng kmie ka sngewkhia bad bitar ia ka jingleh ka sorkar MDA hapoh ka jingialam u Myntri rangbah Conrad Sangma ia ka dong Ri Bhoi sepngi kaba leh mynthi ia ka jingdawa ki paidbah ban kyntiew kyrdan ia ka Admnistrative Unit Patharkhmah sha ka Civil Sub-Division ka la kynjoh 30 snem.
“Kumno ngin khmih lynti ban nangkiew shakhmat ha ka roi ka par lada ka sorkar kam lah ban kyntiew kyrdan wat ia ka ophis administrative kaba la don 30 tam, watla ka jylla ka la rakhe ia ka jingdap 50 snem u bnai ba la dep ban pyntrei bun ki kam pynroi hynrei ka Patharkhmah bad ka dong Ri Bhoi sepng kan neh kumjuh,” kynnoh ka CORP.
Na ka liang ka CoRP ka dawa ban ai noh ia ka Mariang Civil Sub-Division sha Patharkhmah ban kyntiew kyrdan ia ka administrative unit kaba la don mynta palat 30 snem. Kumba ka sorkar ka angnud ban wanrah ia ka jingiajan bad ki paidbah ha ka jingtreikam kam dei ban shu kular tang ka ktien bad ka dei ban pyni da ki kam ban plie noh ia ka sub division ka shwa ilekshon 2023.
Ha ka jingshisha ka sorkar ka la dei ban pynbna ban ai noh ia ka sub division ha ka sngi ba plie ia ka district thymmai ha Mairang khnang ba ki paidbah Ri Bhoi ki ioh iakmen ha katei ka sngi bad ki nongMairang hynrei kaba lyngngoh haduh mynta ka leh klet ia katei ka kam.
katkum ka rukom ia ka sub division na kiwei ki ophis hadien ba la kyntiew kyrdan dei ba ai sha kiwei kiba dang donkam ba kin ioh jingmyntoi bad ym sepei. Ka jingleh bym mon ka sorkar ka pynpaw ba ibein ia ki paidbah ka thain Ri Bhoi sepngi bad kumba long mynta ki kam pynroi ka sorkar MDA kin oh shiliang ha katei ka dong.
Kum ban pynpaw ka CoRP ka la dawa naduh ki sorkar barim ban kyntiew kyrdan ia ka administrative unit na sha ka civil sub division na bynta ka jingbit jingbiang ki paidbah namar ki paidbah ki shitom ban leit ban wan sha Nongpoh ba ka jngai kumba 70 km na Patharkhmah.
Lah ban pynpaw ba ka administrative unit Patharkhmah ka dei kaba la rim tam bad ka dei hok ban ioh ia ka sub division, namar ka paw shakhmat eh na kiwei kum ka Pynursla bad ka Ranikor hynrei ki ioh pynban kiwei ki jaka ki bym pat don wat tang ha administrative unit. Hoto kam dei ka jingleh shiliang ne ibein ia ki paidbah. Na ka liang ka CoRP kan ym shong kli kti kan iaid bud dien ia ia kane ka kam tad ban jop.
Ia kane mat ka Western Ri Bhoi Dorbar bad ka Ri Bhoi Dorbar lem bad kiwei ki sengbhalang ki la dawa na ka sorkar ban kyntiew kyrdan ia ka Administrative unit Patharkhmah sha ka Civil Sub Division, hynrei ka sorkar kam niew burom ia kitei ki rangbah ne ki paidbah ka Jirang konstitwensi bad ka shukut tang ha ka jingiakynduh ha secretariat. Kane ka long katkum ka kyrwoh khubor ba la phah da u bah Gershome Hat, Vice President ka CoRP.
