Nongstoin, Naitung 22: Ka seng FKJGP Risiang kala phah da ka jingthoh sha u Executive Engineer PWD (Road) Nongstoin Division, West Khasi Hills District ha kaba ka seng kala dawa ba dei ban pynbha ia ka surok na Nongpyndeng sha Risiang kaba don haduh 10 km.
Ka Seng Federation of Khasi, Jaintia and Garo People (FKJGP) Risiang Area Unit, ka kyrpad ia ka PWD ban kynroh noh ia ka surok kaba la twa ba sah satang marshiteng ban iaid kali ha ka 6km na Nongstoin sha Risiang kaba la buh jingma ia ka leit ka wan lyngba katei ka surok bad ka lah ban dkut ha kano kano ka por.
Ban shna nala ban iaid ka um ha ki bynta ka Station jong ka shnong Risiang 10km ka bym don nala um kaba pynlong ia ka um kaba heh bha ban tuid sha ki ïing jong ki briew kaba la ktah jur bad buh jingma bad ktah ruh ia ki longïing ba shong hajan surok.
Ka seng ka kyrpad ruh ia phi ban pynbha (repair) da kaba thep maw ia ki jaka ba long thliew bad ba sniew na Nongpyndeng-Risiang 10km. Ban shna nala um surok Nongpyndeng sha Risiang 10km, namar ka jingbymdon ki nala um ka pynsniew ia ka surok.
Ka surok ka long ka budlum ia ka ioh ka kot, ia ka roi ka par jong ka thain sa shisien ngi kyrpad jur ban phin phai khmat lem ia ka thain jong ngi khnang ba ki paitbah kin ym jynjar ha ka leit ka wan khamtam ia kiba pang ba shitom, ba haba shitom ki hap ban leit phah sumar sha Nongstoin, la ong u bah Bhalang John Kharbani President ka Risang FKJGP Unit ha ka kyrwoh.
