Shillong, Jymmang 09: U President jong ka seng Hynniewtrep Achik National Movement (HANM) u bah Lamphrang Kharbani u la ong ba ka sorkar ka dei ban pyndam noh ia ka jingpynbna ka sorkar Assam ba la rah ia ka Block I bad Block II sha sha sha Mikir.
Haba kren ha ki lat pathai khubor mynta ka sngi la ong ba lada shim na ka North Eastern Area (Reorganisation) Act, 1971 kala kren shai ba ka Block I bad Block II kim hap shuh hapoh Meghalaya, ban wan rah biang ia ki sha Meghalaya don kam ban pyndam noh ia ka jingpynbna 1951 bala rah sha Mikir ia ka Block I bad Block II.
U Bah Lamphrang la ong ba ki khraw pyrkhat bad ki heh sorkar kitip bha ia kane ka bynta hynrei kiba bun balang kim da sngewthuh ia kane ka phang, la ong ba shwa ka snem 1951, ia ka United Khasi and Jaintia Hills District jong ka State of Assam mynshwa la phiah ha ki artylli ki Civil Subdivisions.
ka Shillong Subdivision bad ka Jowai Subdivision. Ka Block I bad Block II dei ki block jong ka Jowai Civil Subdivision. Ka Raid Nongtung kaba don ha Block II ka dei ka Raid hapoh ka Nartiang Daloiship. Ki tymmen ki tip bha ba ka Raid Nongtung ka siew khajna bad kiwei kiwei ki synniang sha u Daloi Nartiang.
Ha ka snem 1951 la seng ia ka United Mikir and North Cachar Hills District, bad la ot ia ka Block I bad Block II na ka Jowai Civil Subdivision bad la pyniasnoh bad ka Mikir Hills da ka order u Governor ka Assam, No. TAD/R/31/50/149, dated 13th April, 1951.
La leh is kane ymdei namar ba kitei ki jaka ki dei ki jaka Karbi, hynrei tang na ka bynta ban suk ka jingtrei kam (administrative convenience) ha kata ka por. Haba wan mih ka United Khasi-Jaintia Hills Autonomous District Council ha ka snem 1952 ruh ia ka Block I bad Block II ym shem la wan rah hapoh u pud u sam jong ka.
Haba la ioh ia ka Autonomous State ha ka snem 1969, bad ka full[1]fledged State ha ka snem 1972 ruh ym shem la kynthup ia ka Block I bad Block II hapoh u pud u sam ka Meghalaya.
Ha ka Assam Re-organisation (Meghalaya) Act, 1969 ia u pud u sam ka Meghalaya Autonomous State la thoh shai “shall comprise the following tribal areas: The United Khasi[1]Jaintia Hills District (excluding the areas transferred to the Mikir Hills Autonomous District by the notification of the Government of Assam No. TAD/R/31/50/149 dated 13th April, 1951), and the Garo Hills District.
Ki Rangbah nongialam jong ngi ha kato ka por ki khlem poi kynmaw peit ia kane ka Exclusion clause ia ka Block I bad Block II wat la ka paw tyngkrein ha ka Act. Ka history bad ki jingshisha ha madan, ki kdew shai ba ka Block I bad Block II ki dei ki jaka Hynniewtrep, hynrei hakhmat ka ain ki dei ki bynta ka Assam bad Karbi Anglong katba dang sah bad dang ieng katei ka Notification jong ka Sorkar Assam.
Dei na kane ka daw ba ka Sorkar Assam ka buh police battalion mynta ha Block II katba ka Sorkar Meghalaya ka buh police outpost ha shnong Mawlasnai. Ki nongshong shnong ka Block II ki thep vote sha Assam bad sha Meghalaya.
Ka Sorkar Assam ka nud ban buh poling station man ka shnong, hynrei ka Sorkar Meghalaya ka phah wan thep vote ia baroh ki shnong sha Mawlasnai, ka shnong kaba la jngai na kitei ki disputed areas. Ha ka history bad ki official documents baroh ka paw shai ba kitei ki jaka ki dei ki jaka Hynniewtrep kiba la hap mynshwa hapoh ka Jowai Civil Subdivision.
Hynrei ha ka ain bad officially, kim hap hapoh ka State Meghalaya, katkum ka Assam Re-organisation (Meghalaya ) Act 1969, bad 1971. Namar kata ngin ym ioh bor ban dawa ia kitei ki jaka kum ki jaka Meghalaya kaba la wan mih dang ha ka snem 1972.
Hynrei ngin dei ban dawa kum ki jaka Hynniewtrep naduh hyndai hynthai. Ka daw ba la pynsnoh sha Mikir Hills ruh kam dei halor ka territorial, ethnic and cultural ground hynrei tang namar jong ka administrative convenience ha kata ka por.
Namarkata, ngi dei ban iai dawa ba dei ban pynduh noh ia katei ka Notification, 1951 jong ka Sorkar Assam bad ban wan rah biang ia kitei ki jaka sha ka Ri Hynniewtrep. Lada ngi pynieng nia ba ki hap hapoh u pud u sam ka Meghalaya te ngi la rem lupa namar ka Act 1971 kaba thaw ia ka Meghalaya ka la kdew shai lupa ba kitei ki jaka ki lait na u pud u sam ka Meghalaya.
Ha pdeng ka jingtyrha bad sngewkiram ia kane ka mat kaba ktah bad dung ia ka mynsiem da ka jingsngewkhia ka dohnud ngi ki Samla ka Ri ki ba dei ki khun jong ka Mei Meghalaya ngi ieng ha ka nongrim ngin trei minot ban pynneh pynsah ia la ka jong ka hok long trai man trai halor ka khyndew ka shyiap kaba la don naduh ka mynnor.
Ha kaba iadei bad ka Boundary issue ka dei ban dei naduh kata ka Foundation of Six Scheduled kata ka dei naduh ba la pyntrei kam ia ka riti synsahr jong ka Ri India ha ka 26th Kyllalyngkot 1950 wei ba la pynlong da ka Constituent Assembly kata hi ka skhem ba ia u pud u sam ka dei ban shim bad pynieng bha ia la ka nongrim.
Ha ka jingshisha la kha ia ka Jylla Meghalaya kat kum u pud u sam jong ka Six Scheduled 1950. Ki riewrangbah ha kata ka por ki shaniah beit ha u pud u sam jong ka Six Scheduled hynrei kaba lyngngoh ba balei ki Sorkar mynta ki khein sting ia ka jingkyntur pud ka Assam. Ha kaba iadei bad ka MOU jong ka bynta kaba nyngkong kaba la dep ban iasoi HANM Land Protection Cell kam pdiang.
