Shillong, Nailar 25: U President ka seng HYC u bah Robert June Kharjahrin la ong ba ha dein ba kila ioh jigntip bha ka jingthep kyrteng ban leit pule doktor MBBS ha ki jaka pule bapher bapher kiba dei na ka bhah jong ka sorkar jylla, ba na ka bhah paidbah la thep ia ki bymdei ki riewlum.
Na kiba thep kyrteng kumba san ngut ei ei kita ki long ba ia ka jinglong trai shnong na Meghalaya ka dang pynartatien hynrei kila apply ban leit pule doktor na ka bhah jong ka jylla Meghalaya bad kaba sngewlyngoh ka long ba ka kyrteng jong ki kala mih ha ka list.
U bah Robert la ong ba haduh mynta ka sorkar kam pat pdiang, kaei kaba dei ban sngewthuh shai ka long ba kiba lah ban apply ki dei ban dei ki nongshong shnong ba pura jong ka jylla Meghalaya, lait na ki trai jylla kiba lah ban apply dei tang kito kiba don ia ka syrnot nongshong shnong ba pura.
La ong ba ymda tip bha ha kiwei ki District jong ka jylla hynrei ka jingai syrnot nongshong shnong ba pura ha East Khasi Hills District ka dei kaba da bniah bha ha kaba kida pynlong ia ka jingtohkit bad kam dei kaba suk ba wat ki khun jong ki nongtrei sorkr kiba wan trei ha Meghalaya kim juh ioh ban apply ia ka bha na ka jylla.
U Bah Robert u la ong ba ka ka don ka jingsuba ba kine ki briew ki dei na ka jylla Assam bad kala don ka jignkynnoh ba kila ioh ruh iaka synrnot nongshong shnong na Garo Hills, lada kane ka long shisha ka seng kan nym lah ban pdiang lada ki briew ki ioh ia ki kot ki sla da kaba shu leh thok.
Namar ia ka bhah ban pule doktor ia ki seat la thied da ka sorkar Meghalaya da ka pisa jong ki paidbah ka jylla bad kine ki juh ki briew ki apply ruh na ka jylla Manipur kaba mut ba ia ka jinglong nongshong jong ki ka long ka bym thikna la ki dei na Meghalaya, Manipur ne ki lah ban dei na Bangladesh kaba ym lah ban tip jong long nongshong shnong.
Namar ym lah ban don ar tylli ka syrnot nongshong ba pura bad kawei ka jaka sah ba shipor ban ong ba don ar tylli ki jaka sah ba pura ka long kaba ym lah ban long, halor kane ka seng kala ia kynduh ia ka myntri ka tnad ka koit ka khiah ka Dr. Ampareen Lyngdoh ban pynpaw ia kane.
Ha kane ka jingiakynduh na ka liang jong ka seng kala dawa ban da tohkit bniah ia ka jinglong ka jong ki, lada ai noh ia kane ka bhah sha ki kaba mut saw seat ki briew jong ka jylla kila duh. Kumba ka long ka jylla ka don ha pdeng ka jingduna ki doktor ka daw ba kiba la pass kim wan phai sha ka jylla.
Kitei ki briew lei lada ki pass ruh kin nym wan phai, ka jingduh nong ka long ba kitei ki briew kin nym wan phai bad ka jingduh ka long ba ki trai shnong kila duh ia ka bhah, ha katei ka jingiakynduh kila dawa ban da tohkit kit bha ia ki ym dei ban shu pdiang kumto.
U bah Robert u la iathuh ba ka myntri kala kren shai ba kan sa ia kren ia kane ka kam ha ka Kabinet bad la da ka kabinet ka shah ia kane dei ban don da ka kynhun tohkit bad katba dang tohkit ia ka kyrteng jong ki ym pat dei ban pynlait.
