Shillong, Nailur 03: Mynta ka sngi ka seng Hynniewtrep Youth Council (HYC) hapoh ka jingialam jong u President u bah Robertjune Kharjahrin kila leit ban ia kynduh ia u Director General jong ki pulit ka jylla u R Chandranathan ban ia kren halor ka jingpynmih ka jylla Assam ia ka National Register of Citizens.
Haba kren ha ki lad pathai khubor ha dien ka jingiakynduh bad u DGP u bah Robert u la ong ba ha kane ka jingiakren na ka liang jong ka seng kala kyntu ia u heh pulit duh ka jylla ba un behtah ia baroh ki shnong ba kin da buh ia ka register jong ki nongshong shnong bad ban ai ia ka jingtip sha ki pulit.
Kane ka long ban pynthikna ia ka jingkhanglad ia ki briew kiba wan sha kane ka jylla, namar kumba ka long mynta ia ka NRC dang leh tang ha ka jylla Assam, kiba bun na kine ki don ia ki EPIC, ki laisen niah kali bad lada kim don kyrteng ha Assam lada ki phet sha kawei ka jylla kin long biang ki nong India.
Ban khanglad ia ka jingwan rung ka jong ki ka long kaba bha lada ki shnong kin don ia ka register ka ban buh ia ki kyrteng jong ki nonhshong shnong bad kane ka long ban khanglad ia ki briew ban ioh rung ha ki shnong ki thaw.
Ka seng HYC kala ia kren ia kane ka kam bad ki bor jong ba dei peit ia ki District bad ki sngewthuh ba ka tnad ba dei peit ia ka jingrung jong ki briew ha kane ka jylla Meghalaya ka long kaba tlot haduh katta katta.
Halor kane mynta ka sngi kila ia kynduh ia u DGP mynta ka sngi ha kaba kila dawa ba dei ban buh shuh ia ki khyrdop ban peit ia ka ja jingrung ki briew ha kane ka jylla ha baroh ki khappud bad ka Assam kumba bad ka Bangladesh.
Ka HYC kala dawa ba dei ban don ki briew ban peit ia ka jingrung ki briew sha kane ka jylla bad ban pynbun shuh shuh ia ki nongtrei ha kaba ki lah ban trei baroh arphewsaw kynta, la ong u Bah Robert President ka HYC.
